Эх, залётныя!

Источник материала:

Канферэнц-зала

Мы, беларусы, — гасцiнныя людзi. Аднак з iншаземцамi, якiя парушаюць нашы законы, не цырымонiмся. Такiх «свавольнiкаў» праваахоўныя органы краiны адразу ж выганяюць на гiстарычную радзiму.

Як паведамiў падчас сустрэчы з журналiстамi намеснiк начальнiка ўпраўлення Дэпартамента па грамадзянству i мiграцыi МУС Беларусi Генадзь Бубновiч, з году ў год павялiчваецца колькасць гасцей нашай краiны. Летась, напрыклад, толькi ў органах унутраных спраў Беларусi зарэгiстравалiся больш за 300 тысяч iншаземцаў. Гэта на 50 тысяч больш, чым у 2005 годзе. I пераважная большасць замежнiкаў паводзiць сябе ў нашай краiне законапаслухмяна. Летась iншаземцы здзейснiлi 1923 злачынствы, што амаль на 9 працэнтаў менш, чым пазалетась. Беларускiя праваахоўныя органы даволi жорстка ставяцца да замежных гасцей, якiя здзяйсняюць нават адмiнiстрацыйныя правапарушэннi. Напрыклад, за грубае парушэнне Правiлаў дарожнага руху, у асноўным за кiраванне транспартным сродкам у стане алкагольнага цi наркатычнага ап’янення, у гэтым годзе былi высланы з нашай краiны 18 замежнiкаў. Летась за падобныя «свавольствы» з беларускай зямлi былi выгнаны 164 iншаземцы. Таксама не затрымлiваюцца ў Беларусi i замежныя грамадзяне, якiя адбывалi пакаранне ў тутэйшых месцах пазбаўлення волi. У мiнулым годзе на гiстарычную радзiму былi адпраўлены 445 такiх асобаў. Сярод няпрошаных гасцей апошнiм часам апынулiся i гандляры насваем. Гэтае зелле набывае папулярнасць у беларускiх падлеткаў, што вельмi непакоiць супрацоўнiкаў мiлiцыi i медыкаў. Бо насвай наносiць шкоду арганiзму: выклiкае гiбель нервовых клетак, а нярэдка i моцныя апёкi. Паколькi гэтае зелле пакуль не аднесена да лiку наркотыкаў, то крымiнальная адказнасць за яго распаўсюджванне ў Беларусi не прадугледжана, але гандаль забаронены. Аднак некаторыя паўднёвыя госцi не зважаюць на нашы парадкi i едуць у Беларусь са сваiм насваем. Праўда, доўга тут не затрымлiваюцца. Сёлета мiлiцыянеры ўжо выслалi з Беларусi 5 грамадзян Узбекiстана i 2 таджыкаў, якiя гандлявалi насваем.