Чым айчынныя кансервы горшыя за iмпартныя?..

Источник материала:

Iгар ШЧУЧЭНКА

Адна з праблем, пра якую вёў гутарку на пасяджэннi Анатоль Фiлонаў, — знiжэнне выпуску прадукцыi шэрагам арганiзацый галiны. Нягледзячы на тое, што за студзень—сакавiк у рэспублiцы было выраблена 47,42 млн умоўных бляшанак (муб) плодаагароднiнных кансерваў, што на 4,5 працэнта больш, чым за аналагiчны перыяд мiнулага года, тым не менш у параўнаннi з леташнiмi студзенем—сакавiком арганiзацыi Вiцебскай, Гомельскай, Мiнскай абласцей i спажыўкааперацыi выпуск данай прадукцыi знiзiлi. Асноўнымi прычынамi гэтага, на думку Анатоля Фiлонава, з’яўляюцца значныя складскiя запасы гатовай прадукцыi, што звязана з невыкананнем гандлёвымi арганiзацыямi ўстаноўленых аб’ёмаў яе рэалiзацыi на ўнутраным рынку, а таксама недахоп уласных абаротных сродкаў у прадпрыемстваў для закупкi сыравiны, матэрыялаў, тары.

Яшчэ адна праблема, якая патрабуе неаднакладнага вырашэння — складанасцi з рэалiзацыяй айчынных кансерваў. Летась у краiне было спажыта 413,6 муб, прычым больш за палову патрэбнасць у кансервах задавальнялася за кошт iмпарту. У той жа час складскiя запасы беларускiх прадпрыемстваў складаюць 65 муб — гэта чатырохмесячны аб’ём вытворчасцi згаданай прадукцыi. Каб выправiць сiтуацыю, Анатоль Фiлонаў прапанаваў абмежаваць прыток на ўнутраны рынак рэспублiкi iмпартных плодаагароднiнных кансерваў, увёўшы практыку сезонных мытных пошлiн на спажывецкiя тавары. Незадаволены ў канцэрне «Белдзяржхарчпрам» таксама i тым, якiмi тэмпамi зараз вядзецца рэканструкцыя прадпрыемстваў, што займаюцца вытворчасцю плодаагароднiнных кансерваў. Што, дарэчы, пацвярджаецца тым фактам, што ўдзельная вага прадукцыi ў сучасных вiдах тары на большасцi прадпрыемстваў застаецца на нiзкiм узроўнi. Так, за студзень—сакавiк гэтага года было выраблена 21,42 муб плодаагароднiнных кансерваў у сучасных вiдах тары. I хоць пэўны прагрэс тут назiраецца — гэта складае 125,2 працэнта да адпаведнага леташняга перыяду, аднак у агульным выпуску ўдзельная вага гэтай прадукцыi — усяго 45,2 працэнта.

Як было адзначана на пасяджэннi, рэнтабельнасць прадпрыемстваў плодаагароднiннай галiны складае толькi каля 3 працэнтаў, прычым 17 арганiзацый у студзенi—сакавiку спрацавалi са стратамi. Мяркуецца, што па вынiках праведзенага на пасяджэннi Прэзiдыума Савета Мiнiстраў аналiзу ходу развiцця вытворчасцi плодаагароднiнных кансерваў будзе распрацаваны комплекс неабходных мераў, якiя дазволяць выправiць тут сiтуацыю.