Адначасовае перамяшчэнне зрэнак з боку ў бок паляпшае памяць

Источник материала:

Iнфарм-укол

Падчас праведзеных даследаванняў тая група добраахвотнiкаў, якая штодзень рабiла гэты просты комплекс практыкаванняў для вачэй, значна перасягала па ступенi запамiнання новых слоў, вобразаў i гукаў групу добраахвотнiкаў, якiя не рабiлi падобнай гiмнастыкi. Згодна з падлiкамi, памяць паляпшаецца па меншай меры на 10 працэнтаў.

Як гавораць вучоныя, адначасовае перамяшчэнне зрэнак узмацняе каардынацыю двух паўшар’яў мозгу, прычым найбольшую эфектыўнасць забяспечвае адначасовае перамяшчэнне зрэнак менавiта з боку ў бок, чым уверх i ўнiз.

Кар. БЕЛТА.

ЧВЭРЦЬ НАСЕЛЬНIЦТВА ЗЯМЛI МАЕ СХIЛЬНАСЦЬ ДА IНФАРКТУ МIЯКАРДА

Чвэрць насельнiцтва Зямлi мае генетычную схiльнасць да iнфаркту мiякарда ў сувязi з асобай мадыфiкацыяй парных генаў, якiя адказваюць за работу сардэчна-сасудзiстай сiстэмы. Аб гэтым паведамляюць iнфармагенцтвы са спасылкай на нядаўнiя даследаваннi iсландскiх i канадскiх вучоных.

Тым самым пацвярджаюцца меркаванні аб тым, што iнфаркт мiякарда часткова вызначаецца спадчыннасцю. Як устанавiлi вучоныя, у людзей з мадыфiкаванай парай генаў рызыка iнфаркту павялiчваецца на 60 працэнтаў у параўнаннi з тымi, хто мае «традыцыйную» версiю гэтых генаў.

Выснова была зроблена на аснове буйнейшага за ўсю гiсторыю навукi генетычнага абследавання вялiкiх груп насельнiцтва ў Iсландыi i Канадзе.

Кар. БЕЛТА.

АБМЕЖАВАНАЕ ЗАСТОЛЛЕ

Любое застолле — гэта парушэнне ўсемагчымых правiлаў здаровага харчавання. Тым не менш, i тут можна знайсцi кампрамiс. Свята не стане горш, калi паводзiць сябе згодна з некаторымi простымi правiламi.

1. Выбiрайце з мноства страў самыя карысныя i ешце iх як мага павольней.

2. Пачнiце з салата з агароднiны — ён падыходзiць да любых напояў.

3. Не рабiце на талерцы мешанiну з мяса, рыбы, птушкi i каларыйных салатаў.

4. Скарацiце да мiнiмуму ўжыванне алкагольных напояў, якiя ўзмацняюць апетыт i знiжаюць увагу ў дачыненнi да таго, што вы ясце.

5. Больш размаўляйце з гасцямi: больш размаўляеш — менш ясi.

АХ, ГЭТЫ ГОРКI ШАКАЛАД!

Дыетолагi прыйшлi да высновы, што чорны шакалад знiжае цiск.

Тэст-групе, у якую ўвайшлi людзi з невялiкай гiпертанiяй (у сярэднiм — 153/84) штодня давалi па 100 г горкага шакаладу.

I хоць яны не дасягнулi iдэальных паказчыкаў, усё ж такi праз два тыднi ва ўсiх удзельнiкаў было зафiксавана знiжэнне верхняга цiску прыкладна на 5 пунктаў, а нiжняга — на 2.

ЖАНIЦЦА, АБАВЯЗКОВА ЖАНIЦЦА!

Спецыялiсты не ўтойваюць той факт, што мужчыны ў шлюбе значна больш здаровыя за халасцякоў i разведзеных. Даследаваннi паказваюць, што:

— халасцякi пасля 45 гадоў на 23 працэнты часцей памiраюць да наступлення старасцi — жанаты мужчына жыве ў сярэднiм на тры гады даўжэй;

— разведзеныя мужчыны ў два разы часцей за жанатых iдуць на суiцыд або становяцца пацыентамi псiхiятраў;

— верагоднасць, што разведзены курэц памрэ раней за жанатага — 70 працэнтаў;

— у халасцякоў пасля 45 гадоў значна вышэй артэрыяльны цiск.

Праўда, у жанатага мужчыны больш шанцаў памерцi ад iнсульту цi iнфаркту падчас сэксу — асаблiва, калi гэта сэкс не з жонкай.

УСЁ КАРЫСНАЕ — ПРОСТАЕ

Той, хто намагаецца харчавацца не толькi смачна, але i з карысцю для здароўя, павiнен ведаць, што:

1. У гатаваным малацэ менш тлушчу, больш вiтамiну В, мiнералаў i кальцыю, якiя ўмацоўваюць iмунiтэт.

2. Замест сырой морквы лепей ужываць вараную. Так арганiзм лягчэй засвойвае вiтамiн А, якi ўмацоўвае косцi, сардэчную мышцу i ачышчае скуру.

3. Варта аддаваць перавагу чырвоным яблыкам перад зялёнымi — у iх больш бэта-карацiну.

4. Негазаваная мiнеральная вада лепш за газаваную. Таму што ў ёй менш натрыю, шкоднага для сэрца.

5. Паколькi вiтамiн Е баiцца святла, алiўкавы алей павiнен быць у бляшанай, а не шкляной тары.