«Не магу пагасiць частку крэдыту за кошт чэкаў, плачу павялiчаныя працэнты...»

Источник материала:

Я стала ў чаргу як маючая патрэбу ў паляпшэннi жыллёвых умоў у Калодзiшчанскiм сельскiм Савеце 22 сакавiка 2006 года. Паколькi будаўнiцтва жылля для такой катэгорыi насельнiцтва вядзецца вельмi маруднымi тэмпамi, у чэрвенi таго ж года я заключыла дагавор долевага будаўнiцтва за ўласныя сродкi. У лiстападзе ўнесла 30 працэнтаў кошту жылля, а для аплаты 70 працэнтаў, што засталiся, узяла мэтавы крэдыт. Я скарыстала права праiндэксаваць i выкарыстаць iмянныя прыватызацыйныя чэкi «Жыллё» для частковай аплаты кватэры, якая будавалася: Мiнскiм раённым выканаўчым камiтэтам 20 сакавiка 2007 года належныя мне чэкi «Жыллё» на суму 17 086 200 рублёў праiндэксаваны i пагашаны. Аднак мне не была прадастаўлена магчымасць у 10-дзённы тэрмiн пагасiць частку ўзятага крэдыту на азначаную суму — у парушэнне п. 5 Пастановы Савета Мiнiстраў Рэспублiкi Беларусь ад 15.11.2006 г. № 1529 i Дэкрэта Прэзiдэнта Беларусi ад 28.08.2006 г. № 13. Пры вусным звароце да спецыялiстаў ЖКГ Мiнаблвыканкама мне параiлi «патэлефанаваць па вырашэнню пытання ўвосень». З 15 снежня 2006 года я аплачваю працэнты банку за карыстанне крэдытнымi сродкамi — 213 578 рублёў у месяц з улiкам пераплаты. Чаму я, маючы на руках рашэнне мясцовага выканаўчага органа аб iндэксацыi i пагашэннi чэкаў, не магу пагасiць частку запазычанасцi перад банкам па ўзятаму на будаўнiцтва жылля крэдыту?

Таццяна Анатольеўна ПАЎЛЮКЕВIЧ, г. Мiнск.

Пытанне заяўнiцы адносна пералiчэння грашовых сродкаў ад iндэксацыi iмянных прыватызацыйных чэкаў «Жыллё» было разгледжана аддзелам жыллёва-камунальнай гаспадаркi Мiнскага аблвыканкама.

«Рашэннем Мiнскага райвыканкама ад 20.03.2007 г. № 929 гр. Паўлюкевiч Т.А. праiндэксаваны чэкi «Жыллё» як стаячай на ўлiку маючых патрэбу ў паляпшэннi жыллёвых умоў з 22.03.2006 г. Да iндэксацыi былi прадастаўлены 1060 падораных чэкаў «Жыллё». Iндэкс росту кошту будаўнiцтва на момант падачы заявы складаў 16 120. Такiм чынам, сума праiндэксаваных чэкаў «Жыллё» складае 17 087 200 рублёў.

Згодна з Палажэннем аб парадку iндэксацыi iмянных прыватызацыйных чэкаў «Жыллё», зацверджаным Пастановай Савета Мiнiстраў Рэспублiкi Беларусь ад 15 лiстапада 2006 г. № 1529, пасля прыняцця рашэння мясцовы выканаўчы i распарадчы орган накiроўвае выпiску з рашэння аб iндэксацыi чэкаў «Жыллё» ў адкрытае акцыянернае таварыства «Ашчадны банк «Беларусбанк», якое ў дзесяцiдзённы тэрмiн з дня яе атрымання спiсвае са спецыяльных (чэкавых) рахункаў грамадзян адпаведныя сумы. Закрыццё чэкавых рахункаў у ААБ «Беларусбанк» не азначае пералiчэння грашовых сродкаў на ўказаныя грамадзянскiя рахункi.

Згодна з рашэннем Мiнскага абласнога выканаўчага камiтэта ад 10.05.2006 г. № 452 «Аб парадку пералiчэння грашовых сродкаў па праiндэксаванай жыллёвай квоце (iмянным прыватызацыйным чэкам «Жыллё»), пералiчэнне грашовых сродкаў адбываецца зыходзячы з даты пастаноўкi на ўлiк як маючых патрэбу ў паляпшэннi жыллёвых умоў i па меры паступлення грашовых сродкаў з бюджэту.

Зараз адбываецца пагашэнне запазычанасцi па праiндэксаваных чэках «Жыллё» па рашэннях, прынятых раённымi выканаўчымi камiтэтамi да 1 студзеня 2006 года. Пералiчэнне грашовых сродкаў ад iндэксацыi чэкаў «Жыллё» па рашэннях, прынятых з 1 студзеня 2007 года, будзе адбывацца пасля пагашэння вышэйуказанай запазычанасцi».