Сродак супраць... чэргаў

Источник материала:

Сваё i надзейна, i танна

Зараз на тэрыторыi Мiншчыны налiчваецца 13 дамоў-iнтэрнатаў, пяць з якiх прызначаны для ветэранаў i iнвалiдаў, шэсць — для псiханеўралагiчных хворых, а два — для дзяцей-iнвалiдаў. Пры гэтым, паводле слоў начальнiка ўпраўлення сацыяльных устаноў i матэрыяльна-бытавога забеспячэння пенсiянераў i iнвалiдаў камiтэта Валянцiны Александровiч, за апошнi час iнтэрнаты перайшлi на 4-разовае харчаванне, тут амаль цалкам выйшлi на стандарты па метражу — 7 квадратных метраў на аднаго чалавека. Важным момантам стала таксама стварэнне рэзервовых крынiц цеплазабеспячэння. Па сутнасцi зараз iнтэрнаты могуць падтрымлiваць належны ўзровень тэмпературы ў памяшканнях нават нягледзячы на магчымыя перабоi з пастаўкамi iмпартных палiўна-энергетычных рэсурсаў.

Дарэчы, зазначыла Валянцiна Александровiч, дзякуючы паступоваму пераходу на мясцовыя вiды палiва iх доля ў балансе цеплазабеспячэння iнтэрнатаў выйшла на адзнаку 48,2 працэнта. I, як чакаецца, да канца гэтага года мясцовыя вiды палiва будуць даваць ужо палову ад усяго цяпла, а ў 2010 годзе — увогуле 60 працэнтаў. Сама па сабе гэта акалiчнасць, адначасова з мадэрнiзацыяй цепласетак, прывядзе да эканомii значных грошай.

Дзеля справядлiвасцi, нельга не прызнаць, што ўтрыманне дамоў-iнтэрнатаў — справа заўсёды нятанная. Калi летась яна каштавала абласному бюджэту 22,4 млрд, то сёлета — ужо 24 млрд рублёў. Да таго ж вялiкiя фiнансавыя ўкладаннi пакуль не дазволiлi вырашыць яшчэ адну праблему — недахопу месцаў. На сёння ў цэлым па вобласцi 150 чалавек знаходзiцца ў чарзе на пасяленне ў iнтэрнаты для пенсiянераў i iнвалiдаў, а яшчэ 280 чалавек — у iнтэрнаты для псiханеўралагiчных хворых.

Прычым не сакрэт: у сувязi з паступовым старэннем насельнiцтва колькасць людзей, якiм будзе неабходна дапамога, меншай не стане. Таму, лiчаць у камiтэце, рабiць стаўку толькi на пашырэнне ўмяшчальнасцi iнтэрнатаў не выпадае. Для пенсiянераў i iнвалiдаў не менш важна адчыняць аддзяленнi кругласутачнага знаходжання. Або ўстановы, дзе у выпадку неабходнасцi пенсiянер цi iнвалiд зможа пажыць часова, — скажам, узiмку.

Суседнi раён — не лепшае выйсце

Доўгi час адной з «адметнасцяў» гарпасёлка Урэчча з’яўляўся напаўзакiнуты ваенны гарадок. Сёння нiхто не хавае, што з цягам часу пустыя, без вокнаў i дзвярэй дамы маглi пайсцi проста пад знос — спадзяванняў на iх аднаўленне было мала. Зрэшты, такой думкi прытрымлiвалiся далёка не ўсе. Вясной мiнулага года з’явiлася рашэнне Любанскага райвыканкама аб стварэннi ў адным з будынкаў колiшняй санiтарнай часцi аддзялення дзённага знаходжання для ветэранаў i iнвалiдаў. Увосень пачалiся работы. А ўжо гэтай вясной аддзяленне (цi па-тутэйшаму — Дом мiласэрнасцi) прыняло першых жыхароў.

— Мала хто верыў, што тут увогуле можна нешта зрабiць, а тым больш — зрабiць у вельмi сцiслыя тэрмiны, — кажа старшыня Любанскага райвыканкама Валерый Грыбанаў. — Аднак мы ведалi: колькасць старых адзiнокiх людзей у раёне будзе толькi па-вялічвацца. I далёка не кожны з iх наважыцца на пераезд у звычайны дом-iнтэрнат на тэрыторыi iншых рэгiёнаў. Бо там iм цяжка прыстасавацца, а ў рэшце рэшт тут — родная зямля.

Стварэнне аддзялення фiнансавалася як з мясцовага, так i з абласнога бюджэту. Але не толькi. Да будаўнiцтва далучылiся практычна ўсе арганiзацыi раёна, адно што давялося купляць матэрыялы. Так удалося зэканомiць значныя сродкi. I да таго ж — зрабiць усё, «як для сваiх». Таму сёння Дом мiласэрнасцi вылучаецца не толькi еўрадызайнам, утульнымi пакоямi, сучасным абсталяваннем. У iм прадумана, здаецца, любая дробязь — аж да рэгулятараў цяпла на батарэях.

— Аддзяленне разлiчана на 40 чалавек, прычым пакуль яно заселена крыху больш чым напалову, — адзначае Валерый Грыбанаў. — Аднак аб тым, што «лiшнiх» месцаў тут не будзе, можна казаць ужо зараз. I асаблiва дарэчы Дом мiласэрнасцi прыйдзецца для жыхароў вёсак.

Мiж тым, зазначаюць у камiтэце, новыя вiды дапамогi «па месцы жыхарства» становяцца рэалiяй не толькi на Любаншчыне. Ужо сёлета ў Старадарожскiм раёне з’явiлася сацыяльная гасцiнiца, працягвае павялiчвацца колькасць аддзяленняў дзённага знаходжання для iнвалiдаў, вынiкамi гэтага года стане адкрыццё аддзяленняў кругласутачнага знаходжання ў Бярэзiнскiм, Клецкiм i Мiнскiм раёнах, а таксама сацыяльных пунктаў у Крупскiм i Смалявiцкiм i фiлiялаў тэрытарыяльных цэнтраў сацыяльнага абслугоўвання — у Слуцкiм i Маладзечанскiм раёнах.

Падобная iнфраструктура дасць магчымасць значнай частцы сацыяльна неабароненых жыхароў вобласцi заставацца дома. Гэткi ж шанц прадастаўляюць i сацыяльныя паслугi на даму. Аднак аб iх — гаворка асобная.

Тарыф застанецца... прымальным?

23,6 тыс. чалавек або практычна сёмая частка пажылых людзей i iнвалiдаў вобласцi, якiя не маюць увогуле або жывуць асобна ад дзяцей i iншых працаздольных сваякоў. Па паказчыку сацыяльнага абслугоўвання на даму Мiншчына ўжо традыцыйна лiчыцца лiдарам па Беларусi. I не ў апошнюю чаргу — дзякуючы самаму нiзкаму тарыфу на паслугi. Сёння ён складае 592 рублi за гадзiну. Праўда, у хуткiм часе гэта «стаўка» можа змянiцца.

— Цяперашнi тарыф быў зацверджаны яшчэ ў 2001 годзе, — заўважае начальнiк аддзела па праблемах пажылых людзей камiтэта па працы, занятасцi i сацыяльнай абароне Мiнскага аблвыканкама Алена Атрушкевiч. — Аднак з таго часу фактычныя выдаткi на паслугi сацыяльных работнiкаў узраслi адразу ў 5 разоў, а, да прыкладу, сярэдняя пенсiя па рэгiёну — у 4,3 раза. З улiкам гэтага ў хуткiм часе можа быць прынята рашэнне аб павышэннi стаўкi аплаты. Разам з тым аплата за паслугi па-ранейшаму застанецца даступнай. Асаблiва калi ўзяць пад увагу той факт, што 94 працэнты грамадзян, што знаходзяцца на абслугоўваннi, карыстаюцца пяцідзесяццю- цi саракапрацэнтнай скiдкай.

Да слова, падкрэслiваюць у камiтэце, павышэнне аплаты дазволiць павялiчыць пералiк сацыяльных паслуг, i ў тым лiку — паслуг аднаразовых. Прычым ужо да канца гэтага года Мiншчына павiнна стаць адзiнай вобласцю краiны, дзе сацыяльныя работнiкi будуць працаваць ва ўсiх без выключэння вёсках.

Любанскi раён.