Давайце ўсталёўваць моду на чалавека працы

Источник материала:

Да юбілею «Звязды» застаўся 71 дзень

На ўзгорку, на скрыжаваннi ўсiх дарог пераўтвараецца ў сучасную ўстанову былы Дом культуры. А з другога боку дарогi ўздымаецца фундамент новай царквы. Неверагодна, але факт: у Вiдамлi, населеным пункце, якому без малога 400 гадоў, нiколi не было храма нiякай рэлiгii. Вось у ХХI стагоддзi рашылi выправiць гiстарычную несправядлiвасць. У новабудоўлi прымае ўдзел i гаспадарка. Хоць i сталi нашы калгасы звацца кааператывамi, таварыствамi, тым самым падкрэслiваючы вытворчую накiраванасць, але жыццё дыктуе свае законы. Там, дзе дбаюць пра культуру, духоўнасць, а не толькi аб прывагах i надоях, там i вытворчасць развiваецца лепш.

— «Звязду» чытаю даўно. Гэта ў нас ужо, можна сказаць, сямейная традыцыя, — адзначае Мiхаiл Стралко. — Жонка, як педагог, больш звяртае ўвагi на матэрыялы па гiсторыi, культуры, адукацыi. Я стараюся праглядаць усё. Чытаем пра цiкавых людзей, пра традыцыi i самабытнасць нашага краю. Не прапускаю, калi трапляецца заметка пра шчырага працаўнiка. Гады тры-чатыры таму, я заўважыў, усе сродкi iнфармацыi крыху звярнулi ўвагу на чалавека працы. Потым хваля схлынула. А дарэмна. Хочам мы таго цi не, а рэклама пастаяннай гульнi з лёсам, лёгкага ўзбагачэння ў вынiку выйгрышу настойлiва асядае ў галовах юнага пакалення. Што гэтаму процiпаставiць? Трэба ўсталяваць моду на чалавека працы. Варта паказваць, як сумленнай штодзённай працай чалавек становiцца паспяховым i стварае свой дабрабыт.