Парадным крокам па праспекту...

Источник материала:

Паводле слоў палкоўнiка Вячаслава Раменчыка, начальнiка аддзела iнфармацыi галоўнага ўпраўлення iдэалагiчнай працы Мiнiстэрства абароны, сёлета ў парадзе возьмуць удзел толькi пешыя калоны, бо тэхнiка выкарыстоўваецца раз у пяць гадоў, на юбiлейныя даты. Падрыхтоўка традыцыйна адбываецца з сакавiка — спачатку адзiночная страявая, потым у складзе падраздзяленняў. Генеральная рэпетыцыя парада пачнецца непасрэдна ў раёне яго правядзення (перасячэнне пр. Пераможцаў i пр. Машэрава ў г. Мiнску) з 27 чэрвеня. Зараз жа ўдзельнiкi ўрачыстага мерапрыемства дыслакуюцца на базе 120-й асобнай гвардзейскай механiзаванай брыгады, на страявой пляцоўцы якой трэнiруюцца, удасканальваючы сваё майстэрства.

Святочны парад на Дзень Незалежнасцi не абыходзiцца без плац-канцэрта Роты ганаровай варты, якая заўжды рыхтуе арыгiнальную праграму. Чым сёлета нас будуць здзiўляць майстры сiнхроннасцi, расказаў палкоўнiк Анатоль Грыцаў, ваенны камендант мiнскай ваеннай камендатуры:

— Гэты плац-канцэрт будзе працягвацца прыкладна 15 хвiлiн, а удзел у iм возьме 151 чалавек. Большасць элементаў у нас не запазычаных, а сваiх, прычым у сёлетняй праграме з’явiлiся новыя складаныя страявыя прыёмы з карабiнам. Назвы iм пакуль не прыдумалi, бо галоўнае — выканаць элементы тэхнiчна ў адзiнай сэнсавай звязцы, каб выступленне спадабалася гледачам. Аб усёй праграме не буду расказваць, таму што гэта трэба бачыць. Заўважу толькi: перад развiтаннем звычайна выносiцца сцяг нашай дзяржавы, а мы вырашылi яшчэ дадаць i элементы, якiя сiмвалiзуюць ваенную арганiзацыю Узброеных Сiл Беларусi.