Рэйд на «дарозе смерцi»

Источник материала:

Супрацоўнiкi Дзяржаўнай аўтаiнспекцыi Мiнскай вобласцi правялi чарговы рэйд па хуткаснаму кантролю на адной з найбольш аварыйна-небяспечных дарог «Мiнск—Мiкашэвiчы». Дарога, на якой у гэты дзень працаваў нарад ДАI, выбрана невыпадкова. На ёй прыкладна адзiн раз у два днi адбываецца дарожна-транспартнае здарэнне. Таму ў трасы «Мiнск—Мiкашэвiчы» з’явiлася другая назва — «дарога смерцi». У апошнi час на кавалках трасы праводзяцца рамонтныя работы, дзе абгон забаронены, шмат на ёй звужэнняў. Вадзiцелi не заўсёды цвяроза ацэньваюць становiшча, таму i выбiраюць «не тую» хуткасць руху. Сiтуацыя ўскладняецца i неспрыяльным надвор’ем. Менавiта гэтыя фактары выклiкалi жудасную аварыю на 99-м кiламетры дарогi «Мiнск—Мiкашэвiчы», у якой сутыкнулiся легкавы аўтамабiль i машына хуткай дапамогi. У вынiку тры чалавекi загiнулi, пяць былi дастаўлены ў бальнiцу з пашкоджаннямi розных ступеняў цяжкасцi. Зрэшты кiраўнiцтва Дзяржаўтаiнспекцыi наўпрост не звязвае правядзенне рэйду з апошняй аварыяй.

— Такiя рэйды для нас — справа звычайная, — расказвае начальнiк упраўлення ДАI Мiнскай вобласцi Сяргей Маслоўскi. — Зараз мы адпрацоўваем навейшую форму выяўлення парушальнiкаў, па варыянту змешанага кантролю: адзiн аўтамабiль з цывiльнымi нумарамi рухаецца з прыборам вiдэафiксацыi хуткасцi, а другi, патрульны, едзе за iм на невялiкай адлегласцi. Толькi сёння за пяць гадзiн мы затрымалi каля дваццацi парушальнiкаў, якiя перавысiлi хуткасць больш чым на 20 кiламетраў.

— Затрыманыя вадзiцелi свае парушэннi тлумачаць тым, што вельмi спяшаюцца, — каментуе рэйд iнспектар спецыяльнага падраздзялення ДАI Мiнскай вобласцi Iлья Кутановiч. — Мы спрабуем растлумачыць, што не заўсёды бывае так: чым хутчэй паедзеш, тым хутчэй прыедзеш.