Гонка раззбраення

Источник материала:

Беларуская мiлiцыя падвяла вынiкi трохмесячнай працы па легалiзацыi няўлiчанай зброi. Нагадаю, што 27 сакавiка гэтага года ўступiў у сiлу прэзiдэнцкi Указ № 148, якi прадугледжваў шэраг мераў па забеспячэнню рэгiстрацыi няўлiчанай зброi.

Паводле памянёнага дакумента, грамадзяне, якiя да 1 лiпеня гэтага года добраахвотна здалi ў мiлiцыю «нелегiтымную» цывільную зброю, не толькi вызвалялiся ад адказнасцi, але i мелi шанц зарэгiстраваць «падпольныя» арсеналы. Як адзначылі ва ўпраўленні iнфармацыi i грамадскiх сувязяў МУС, такой магчымасцю скарысталiся не ўсе ўладальнiкi прыватных арсеналаў. За час дзеяння памянёнага ўказа з нелегальнага абарачэння было выведзена 1038 адзiнак няўлiчанай зброi, з якiх было канфiскавана 211 адзiнак незарэгiстраванай зброi. Добраахвотна для рэгiстрацыi было здадзена 385 агнястрэльных прылад, яшчэ 442 «ствалы» мiлiцыянеры прынялi без права на далейшую рэгiстрацыю. У прыватнасцi, спазнiлiся з легалiзацыяй уладальнiкi паляўнiчых карабiнаў з наразным ствалом i камбiнаванай зброi такога кшталту. Яе рэгiстрацыю можна было ажыццявiць на працягу 12 месяцаў да ўступлення ў сiлу памянёнага ўказа.

Зрэшты, i тыя асобы, у якiх прынялi зброю для рэгiстрацыi, аўтаматычна не стануць уладальнiкамi запаветнага пасведчання. Першапачаткова пiсталет цi стрэльба павiнны прайсцi экспертызу. Калi ў спецыялiстаў не будзе нiякiх прэтэнзiй да зброi, то яе вернуць уладальнiку. «Некандыцыю» канфiскуюць i здадуць на металалом альбо ў музей. У такiм выпадку кампенсацыi гаспадару не прадугледжаны. Не ўсе асобы, чыя зброя паспяхова пройдзе экспертызу, аўтаматычна змогуць яе ўзаконiць. Права на рэгiстрацыю няўлiчанай зброi прадастаўлена толькi грамадзянам Беларусi, якiя дасягнулi 18-гадовага ўзросту i не маюць пярэчанняў з боку адмысловых медыцынскiх службаў i праваахоўных органаў. Пры рэгiстрацыi дубальтоўкi неабходна будзе прадаставiць у мiлiцыю «паляўнiчы бiлет», а падчас пастаноўкi на ўлiк спартыўнага пiсталета — дакумент, якiя пацвярджае прыналежнасць да спартыўнай арганiзацыi па кулявой стральбе. На адну асобу можна зарэгiстраваць не больш за дзве адзiнкi газавай, спартыўнай i наразной паляўнiчай зброi, а таксама не больш за тры «гладкiя ствалы». Працэдура рэгiстрацыi платная: 4 базавыя велiчынi за кожны «ствол». А праз кожныя тры гады давядзецца праходзiць перарэгiстрацыю i плацiць па 2 «базавыя».

Як падкрэслiлi ў Мiнiстэрстве ўнутраных спраў, у большасцi выпадкаў сумленныя грамадзяне прыносiлi ў мiлiцыю паляўнiчыя стрэльбы i газавыя пiсталеты, што засталiся ў спадчыну ад блiзкiх сваякоў.

Але сярод добраахвотна здадзеных небяспечных прыладаў ёсць i сапраўдныя рарытэты, што неўзабаве могуць заняць свае месцы ў калекцыях дзяржаўных ваенiзаваных фармiраванняў цi арганiзацый. Напрыклад, жыхар Гомеля здаў у мiлiцыю зброю часоў грамадзянскай вайны: пiсталет «Фрамер» венгерскай вытворчасцi i шаблю. А вось жыхар вёскi Гарохавiшча Акцябрскага раёна прынёс у мясцовы РАУС 40 гранат i 960 патронаў. Увесь гэты арсенал ён знайшоў на месцы баёў Другой сусветнай вайны.