Палёгка для сельскіх прадпрымальнiкаў замацавана заканадаўча

Источник материала:

Сенатары прынялi да ведама Дэкрэт Прэзiдэнта, паводле якога ў сельскай мясцовасцi будуць стымуляваць прадпрымальнiцтва. Як паведамiў Сцяпан Пiсарэвiч, старшыня Пастаяннай камiсii Савета Рэспублiкi па эканомiцы, бюджэце i фiнансах, згодна з нормамi Дэкрэта сельскiя прадпрымальнiкi на пяць гадоў вызваляюцца ад выплаты падаткаў на прыбытак i нерухомасць, iм знiжаецца плата за атрыманне лiцэнзii. Арганiзацыi, якiя займаюцца рамонтна-будаўнiчымi працамi, да 2011 года вызваляюцца ад пералiчэння сродкаў у галiновыя i нацыянальныя фонды. Прадугледжаны таксама i мытныя льготы. Банкi могуць выдаваць крэдыты да 20 тысяч еўра тым прадпрыемствам i iндывiдуальным прадпрымальнiкам, якiя рэалiзуюць iнвестыцыйныя праекты ў сельскай мясцовасцi. Карыстацца палёгкай не змогуць тыя бiзнэсмены, якiя адначасова вядуць справы i за межамi вёскi.

— Гэта мера накiраваная на недапушчэнне магчымых злоўжыванняў, — пракаментаваў Сцяпан Пiсарэвiч. — Адмысловы льготны парадак не будзе прымяняцца i да тых, хто займаецца гандлёва-пасрэднiцкай, латарэйнай, турыстычнай, страхавой, банкаўскай дзейнасцю, вытворчасцю падакцызных тавараў, ювелiрных вырабаў.

Актывiзуе прадпрымальнiцкую дзейнасць i Дэкрэт аб стымуляваннi вытворчасцi i рэалiзацыi тавараў (работ, паслуг). У iм зафiксаваны комплекс мераў, якiя, мяркуецца, забяспечаць спрыяльны iнвестыцыйны клiмат, развiццё вытворчасцi i рост эскпартнага патэнцыялу ў тых населеных пунктах краiны, дзе пражывае да 50 тысяч чалавек.

— Створаным на гэтых тэрыторыях камерцыйным арганiзацыям дазваляецца набываць сыравiну i камплектуючыя для ўласнай вытворчасцi ад любых пастаўшчыкоў i па любых цэнах, прадаваць уласную прадукцыю на знешнiх рынках па свабодных цэнах, мiнуючы абавязковыя бiржавыя таргi i працэдуры дзяржаўных закупак i паставак, — адзначыў Сцяпан Пiсарэвiч, прадстаўляючы дакумент.

Дэкрэт гэты таксама быў прыняты да ведама сенатарамi.

Ала МАЧАЛАВА.