Аляксандр ГЛЕБ: "Матч з немцамі мы маглi выйграць"

Источник материала:

Журналiст "Звязды" сустрэўся з Аляксандрам Глебам па-за межамi арэны "Фрыц-Вальтэр-Кайзерслаўтарн" адразу пасля заканчэння футбольнага матча i папрасiў адказаць на некалькi пытанняў. Так што блiц-iнтэрв`ю атрымалася дарожным.

— Саша, ты задаволены вынiкам матча Германiя — Беларусь?

— Лiчу, што каманда згуляла вельмi дастойна. Хоць, не палiчыце за нейкае выхваленне, беларусы маглi i выйграць у немцаў.

— На твой погляд, у немцаў быў далёка не самы аптымальны гульнявы склад?

— Зборная Германii моцная з любым падборам iгракоў. Мне здаецца, што яны выглядалi некалькi стомленымi з-за падрыхтоўкi да еўрапейскага першынства. Але ж гэта мой пункт гледжання. Нiчыя — гэта вельмi добры вынiк для беларусаў.

— Па ходу гульнi мы прайгравалi 0:2. Вiдавочна, што гульня не зусiм ладзiлася з-за псiхалагiчнага цiску? Як-нiяк, падтрымка амаль 50-тысячнага стадыёна шмат значыць.

— Хваляванне, канешне, мела месца, хоць для многiх iгракоў зборнай абстаноўка, можна сказаць, была звычнай. Бо i я, i Рамашчанка, i Кульчы, i iншыя мае калегi выступалi i перад больш прадстаўнiчай аўдыторыяй. Першы тайм мы як бы "прывыкалi" да абстаноўкi, футбольнага поля. Ну а потым ўсё пайшло нармальна, i Вiталь Булыга забiў два галы Леману. Канешне, для нашай моладзi гульня ў Кайзерслаўтарне ў пэўнай ступенi экзамен на загартаванне. Лiчу, што ўсе мы паспяхова яго здалi i ў добрым настроi пачалi рыхтавацца да наступнага таварыскага матча з фiнамi.

— Саша, зараз шмат размоў ходзiць пра тое, што ты змянiў лонданскi "Арсенал" на iтальянскiя "Iнтэр" цi "Мiлан".

— Чуткi ходзяць розныя, але можна я не буду адказваць на гэтае пытанне.

— I на заканчэнне зноў англiйская тэма. Як табе нядаўнi фiнал Лiгi чэмпiёнаў "Манчэстар Юнайтэд" — "Чэлсi".

— Шчыра скажу, што гульня не ўразiла, хоць матч быў i цiкавы. Мне здаецца, што калi б гэты паядынак адбываўся ў тэрмiны, калi ў англiйскiм чэмпiянаце была сярэдзiна сезона, ён быў бы больш вiдовiшчны. Мне болей па душы фiнал Кубка УЕФА "Зенiт" — "Рэйнджэрс". Хоць, паўтаруся, гэта мой пункт погляду. Не сумняваюся, для многiх беларускiх балельшчыкаў абедзве сустрэчы прынеслi маральнае задавальненне.

Уладзiмiр ЗДАНОВIЧ,  

Франкфурт-на Майне.