Амаль Br2 млрд будзе выдзелена на стварэнне нацыянальнай сістэмы электроннага кнiгавыдання

Источник материала:

Br1 млрд 870 млн запланавана выдзелiць на рэалiзацыю праекта стварэння нацыянальнай сiстэмы электроннага кнiгавыдання, уключанага ў праграму iнавацыйнага развiцця галiн Мiнiстэрства iнфармацыi на 2007—2010 гады. Аб гэтым на калегii Мiнiстэрства iнфармацыi паведамiў кiраўнiк ведамства Уладзiмiр Русакевiч.

Паводле яго слоў, першы этап стварэння такой сiстэмы завершаны. Вынiкам яго можна лiчыць арганiзацыю на базе выдавецтва "Вышэйшая школа" своеасаблiвай лабараторыi, паслугамi якой будуць мець магчымасць карыстацца i iншыя выдавецтвы, у тым лiку i сiстэмы Мiнiстэрства адукацыi. Выданне электронных кнiг — перспектыўная справа, адзначыў мiнiстр. Попыт на такую прадукцыю будзе расцi. З часам будзе знiжацца яе кошт, паколькi тэхналогiя вытворчасцi пастаянна ўдасканальваецца. Праблему "пiрацтва" сiламi Мiнiстэрства iнфармацыi вырашыць нельга, таму што яна набыла сусветныя маштабы. Але ўсё магчымае ў гэтым напрамку будзе рабiцца.

Уладзiмiр Русакевiч адзначыў, што да канца 2010 года плануецца выпусцiць электронныя варыянты энцыклапедыi "Рэспублiка Беларусь" i "Чырвонай кнiгi Рэспублiкi Беларусь", энцыклапедычных слоўнiкаў i iншых значных выданняў. Акрамя таго, будзе ўдасканальвацца сiстэма падрыхтоўкi спецыялiстаў у галiне электронных сiстэм i тэхналогiй сумесна з Беларускiм дзяржаўным тэхналагiчным унiверсiтэтам.

БЕЛТА.