Цяпло гарантавана

Источник материала:

Ва Ўрадзе

Учора пад старшынствам прэм’ер-мiнiстра Сяргея Сiдорскага на пасяджэннi Прэзiдыума Савета Мiнiстраў Беларусi былi разгледжаны пытаннi падрыхтоўкi народнай гаспадаркi да працы ў асенне-зiмовы перыяд 2008/2009 года. 

Праект адпаведнай пастановы Ўрада прадстаўляў намеснiк мiнiстра эканомiкi Анатоль Фiлонаў, якi праiнфармаваў прысутных аб тых арганiзацыйна-тэхнiчных мерапрыемствах, якiя неабходна правесцi ў рэспублiцы для забеспячэння ўстойлiвага i надзейнага палiва- i энергазабеспячэння. У прыватнасцi, паводле яго слоў, ужо вызначаны аб’ёмы выканання да пачатку ацяпляльнага сезона работ па замене i будаўнiцтве цеплавых сетак. Рэспублiканскiмi i ўнiтарнымi прадпрыемствамi, якiя ўваходзяць у склад аб’яднання "Белэнерга", плануецца правесцi замену i будаўнiцтва 186 кiламетраў цепласетак. Арганiзацыям жыллёва-камунальнай гаспадаркi даводзiцца заданне па замене 729 кiламетраў сетак, што, дарэчы, на 15,5 працэнта больш, чым летась. Найбольшы ж аб’ём работ плануецца выканаць па Мiнскай вобласцi з ростам на 28 працэнтаў.

Як паведамiў Анатоль Фiлонаў, запасы палiўнага мазуту на 1 кастрычнiка, як мяркуецца, будуць складаць 501,5 тысячы тон. Змяншэнне ж аб’ёмаў запасу мазуту ён патлумачыў той працай, што праводзiцца ў краiне па пераводзе кацельных на мясцовыя вiды палiва i газ. Эканомiць дарагi мазут, трэба меркаваць, дазволяць i вынiкi тых перамоў, якiя вядуць "Белтрансгаз" i "Газпрам". У прыватнасцi, як адзначыў мiнiстр энергетыкi Аляксандр Азярэц, гаворка iдзе аб пераразмеркаваннi лiмiту газу ў снежнi гэтага i студзенi наступнага года. Як мяркуецца, у гэтыя месяцы, калi зiма будзе халоднай, пастаўкi газу павялiчацца адпаведна на 120 i 200 мiльёнаў кубаметраў. "Гэта дазволiць пры больш нiзкiх тэмпературах не ўводзiць абмежаваннi для спажыўцоў рэспублiкi", — падкрэслiў мiнiстр. Што датычыцца запасаў прыроднага газу, то сёлета да 20 лiстапада прадугледжваецца стварыць iх у максiмальна магчымых аб’ёмах. Так, у падземныя газавыя сховiшчы павiнна быць запампавана не менш за 760 мiльёнаў кубаметраў прыроднага газу: у Асiповiцкае — 360 млн кубаметраў, у Прыбугскае — 400 (летась запасы ў падземных сховiшчах складалi 660 млн кубаметраў). Затраты на гэтыя мэты ацэньваюцца ў 209 мiльярдаў рублёў.

Паводле iнфармацыi мiнiстра жыллёва-камунальнай гаспадаркi Уладзiмiра Белахвостава, сёлета ў краiне павялiчаны аб’ём капiтальнага рамонту жылля, якi ўпершыню перавысiў 1 мiльён квадратных метраў. У ходзе замены цепласетак не было зафiксавана нiводнага факта звышнарматыўнага — больш за 2 тыднi — тэрмiну адключэння гарачай вады ў жылым сектары.

У сваю чаргу прэм’ер-мiнiстр Сяргей Сiдорскi жорстка адрэагаваў на iнфармацыю дырэктара дэпар- тамента па энергаэфектыўнасцi Леанiда Шэнца пра тое, што да 20 працэнтаў труб, якiя замяняюць у цепласетках, не з’яўляюцца папярэдне iзаляванымi, назваўшы падобнае — "надзвычайным здарэннем". Акрамя таго, ён запатрабаваў ад кiраўнiкоў дзяржорганаў прытрымлiвацца патрабаванняў Дырэктывы Прэзiдэнта № 3, накiраванай на эканомiю энергарэсурсаў. I падкрэслiў у гэтай сувязi, што ўрадам падрыхтаваны канкрэтны план дзеянняў па мадэрнiзацыi i рэканструкцыi ўсiх складнiкоў айчыннай энергасiстэмы аж да канкрэтных кацельных на кожным канкрэтным аб’екце.

Iгар ШЧУЧЭНКА.