Аказваецца, можна абыходзіцца i без таджыкаў

Источник материала:

Без каментарыяў

У расiйскiх журналiстаў выклiкалi цiкаўнасць, здавалася б, зусiм зразумелыя для нас рэчы.

"Звязда" паведамляла ўжо, што амаль увесь мiнулы тыдзень у Беларусi знаходзiлася дэлегацыя расiйскiх журналiстаў. Яны ў рамках чарговага прэс-тура грунтоўна знаёмiлiся з тым, як у нашай краiне вядзецца барацьба з такiм вельмi небяспечным вiдам арганiзаванай злачыннасцi, як гандаль "жывым таварам".

Дваццаць журналiстаў з Расii таксама цэлы дзень правялi ў Мiнскай вобласцi, сустрэлiся з кiраўнiцтвам Капыльскага i Слуцкага раёнаў, наведалi аграгарадок "Цiмкавiчы", шэраг слуцкiх устаноў сацыяльнай сферы, сыраробны камбiнат, убачылi на свае вочы, як жывуць i працуюць беларусы ў сельскай мясцовасцi. Разам з гасцямi ў Мiнскай вобласцi пабываў i карэспандэнт "Звязды". У расiйскiх журналiстаў, натуральна, узнiкала шмат пытанняў да кiраўнiкоў раёнаў. Тое, аб чым пыталiся калегi, — гэта пэўная ўскосная iнфармацыя аб сённяшнiм днi Расii, яе праблемах i клопатах.

Вось некаторыя фрагменты гутарак, як гаворыцца, без каментарыяў.

Так, у першага намеснiка старшынi Слуцкага райвыканкама Васiля Статкевiча на поўным сур’ёзе пацiкавiлiся, як у горадзе мясцовая ўлада абыходзiцца без таджыкаў, хто так чыста прыбiрае на вулiцах i плошчах гарадоў? Як мне здалося, гэта нечаканае пытанне застала знянацку Васiля Пятровiча, але ён хутка знайшоўся i сказаў праўду: беларусы, выключна яны сочаць за парадкам. Наступнае пытанне было больш "лёгкiм": чаму ў вёсках Слуцкага раёна яны не бачаць старых, якiя пахiлiлiся, хацiн, што з iмi зрабiлi?

У старшынi Капыльскага райвыканкама Мiхаiла Боды ў час наведвання аграгарадка "Цiмкавiчы" прама спыталi: цi не баiцца ён таго, што калi-небудзь у раёне з’явiцца знакамiты расiйскi алiгарх Раман Абрамовiч i скупiць землi тутэйшай гаспадаркi? Мiхаiл Тарасавiч даў таксама прамы i адназначны адказ: ён не баiцца, завалодаць Абрамовiчу навакольнымi прасцягамi не атрымаецца.

Такiя вось цiкавыя, на мой погляд, пытаннi. Як гаворыць вядомая руская прымаўка: што каму дапякае, той пра тое i гукае.

Леанiд Лахманенка.

Мiнская вобласць.