Супрацоўнікi ДАІ сябе паказалi i на суседзяў паглядзелi

Источник материала:

У Мiнску прайшоў 11-ы рэспублiканскi конкурс прафесiйнага майстэрства супрацоўнiкаў дарожна-патрульнай службы ДАI. У iм узялi ўдзел каманды з кожнай вобласцi i горада Мiнска, каманда спецпадраздзялення "Страла", а таксама каманды з Расii, Украiны i Лiтвы. 

Урачыстая цырымонiя адкрыцця конкурсу прайшла на лiнii Сталiна. На думку намеснiка мiнiстра Вiктара Жыбуртовiча, узровень конкурсу, дзе супрацоўнiкi ДПС дэманструюць сваё службовае майстэрства, штогод павышаецца.

Намеснiк начальнiка ДАI Ўкраiны Сяргей Протчанка прызнаўся, што Беларусь i Расiя апярэдзiлi сваю паўднёвую суседку па прававым полi, якое надзяляе паўнамоцтвамi супрацоўнiка дзяржаўтаiнспекцыi. Пасля ўказа прэзiдэнта Ўкраiны Вiктара Юшчанкi аб лiквiдацыi аўтаiнспекцыi смяротнасць на дарогах Украiны ўзрасла з 7,5 тысяч чалавек у 2006 годзе да 8,7 тысяч летась. Пасля ўказа аб узмацненнi бяспекi на дарогах, падпiсанага ў лiстападзе мiнулага года, смяротнасць сёлета зменшылася зноў. 8 гадоў таму дзяржаўтаiнспекцыя Ўкраiны страцiла паўнамоцтвы па вынясеннi адмiнiстрацыйных пакаранняў, яны ў дадзены час вызначаюцца судамi. Аднак толькi 70 працэнтаў з 6 мiльёнаў пратаколаў аб адмiнiстрацыйных правапарушэннях на дарогах, складзеных за год, даходзяць да судоў, i толькi ў 40 працэнтах выпадкаў парушальнiк нясе адказнасць.

Нягледзячы на адрозненнi ў заканадаўстве i правiлах дарожнага руху, каманды з краiн-суседак прадэманстравалi высокае прафесiйнае майстэрства ў большасцi конкурсаў. Не было роўных лiтоўскай камандзе ў хуткасным манеўраваннi службовым аўтамабiлем, расiйскiя даiшнiкi прадэманстравалi выдатную фiзiчную падрыхтоўку, а ўкраiнская каманда апярэдзiла сапернiкаў у стральбе. Тым не менш, гэтыя каманды выступалi па-за конкурсам. Перамогу ж, як i летась, святкавала каманда спецпадраздзялення "Страла", услед за ёй другое i трэцяе месца занялi каманды ДАI Гомельскага i Гродзенскага аблвыканкамаў.

Алена КРАВЕЦ.