У АПК чакаюцца праверкi

Источник материала:

У АПК чакаюцца праверкi Дэпартамент дзяржаўнай iнспекцыi працы правядзе месячнiк кантролю за ўмовамi працы ў арганiзацыях аграпрамысловага комплексу падчас жнiва. Аб гэтым карэспандэнту "Звязды" паведамiла прэс-сакратар Мiнiстэрства працы i сацыяльнай абароны Галiна Трафiменка.   Не сакрэт, што найбольш небяспечнай галiной з’яўляецца менавiта АПК, прычым рызыка няшчасных здарэнняў узрастае падчас правядзення масавых палявых работ. У прыватнасцi, зазначыла Галiна Трафiменка, застаюцца нярэдкiмi выпадкi, калi да жнiва прыцягваюцца трактарысты-машынiсты i работнiкi iншых прафесiй без адпаведнай падрыхтоўкi, узнiкае шмат прыкладаў выкарыстання камбайнаў i трактароў, якiя не прайшлi тэхагляд, ёсць шмат пытанняў па тэхнiцы бяспекi ў вытворчых памяшканнях i на збожжатаках.

Апроч таго, практыка паказвае, што многiя работнiкi галiны не забяспечваюцца сродкамi iндывiдуальнай абароны. І больш за тое: насуперак забароне, некаторыя сельгаспрадпрыемствы па-ранейшаму прыцягваюць да цяжкiх работ няпоўнагадовых, i ў тым лiку — да работ на складанай i траўманебяспечнай тэхнiцы.

З улiкам гэтага, з 1 па 31 жнiўня спецыялiсты дэпартамента дзяржiнспекцыi працы наладзяць масавыя як планавыя, так i раптоўныя праверкi сельгасарганiзацый. Пры гэтым, падкрэслiла Галiна Трафiменка, у дачыненнi да парушальнiкаў будуць выкарыстоўвацца санкцыi, а кiраўнiкi i службовыя асобы могуць накiроўвацца на... навучанне па ахове працы. Да таго ж нялiшне нагадаць: дзяржаўны iнспектар працы мае поўнае права прыняць рашэнне аб забароне эксплуатацыi няспраўнай тэхнiкi i механiзмаў, якiя ствараюць пагрозу жыццю i здароўю работнiкаў.

Сяргей ГРЫБ.