"Флікернi" вадзiцелю

Источник материала:

"Флікернi" вадзiцелю

Новыя анекдоты пра святлоадбiвальны элемент, якiя з’явiлiся зусiм нядаўна, па папулярнасцi не саступаюць анекдотам пра бландзiнак. Таму, заўважыла, пры слове флiкер на вуснах многiх з’яўляецца ўсмешка. Але толькi не ў родных тых людзей, якiя страцiлi любiмага чалавека на дарозе. Толькi за тры апошнiя днi мiнулага тыдня ў краiне пад коламi машын загiнула 14 чалавек. Большасць з iх не былi абазначаны святлоадбiвальнiкамi. З 14 чалавек 12 — мужчыны, сярэднi ўзрост якiх 39 гадоў.

Праблема гiбелi пешаходаў на дарогах рэспублiкi, нягледзячы на прафiлактычныя мерапрыемствы, якiя праводзяцца мiлiцыяй, застаецца актуальнай. За 8 месяцаў гэтага года па вiне пешаходаў адбылося 730 дарожна-транспартных здарэнняў, падчас якiх загiнулi 170 чалавек i 580 ранены.

— Часцей за ўсё пешаходы гiнуць пад коламi аўтамабiляў у цёмны час сутак паблiзу населеных пунктаў на неасветленых участках дарог, — гаворыць галоўны спецыялiст аддзела арганiзацыi мiжведамасных узаемадзеянняў i прапаганды бяспекi дарожнага руху ДАІ МУС Уладзiмiр Сцяпанаў. — Таму неабходнасць выкарыстання ў гэтых умовах святлоадбiвальных элементаў вiдавочна.

Дзяржаўтаiнспекцыя правяла эксперымент, падчас якога ўстанавiла, што ў цемры ўбачыць чалавека на дарозе з салона аўтамабiля пры блiжнiм святле фараў можна толькi на адлегласцi да 30 метраў. Пры руху аўтамабiля з хуткасцю 60 км/г за адну секунду аўтамабiль праязджае каля 17 метраў. За гэту ж секунду вадзiцель паспявае толькi нацiснуць на педаль тормазу, але, зразумела, аўтамабiль адразу не спынiцца.

Даследаваннi паказалi, што выкарыстанне пешаходнага адбiвальнiка святла памяншае рызыку наезду на пешахода ў цёмны час сутак на 85 працэнтаў. У святле фар вадзiцелi аўтамабiляў прыкмячаюць пешахода, якi мае адбiвальнiкi на адзеннi, абутку, заплечнiку. Пры руху з блiжнiм святлом вадзiцель заўважае пешахода на адлегласцi да 130—140 метраў. У дальнiм святле фар пешаходныя катафоты дазваляюць чалавеку "свяцiцца" на адлегласцi да 400 метраў. Вадзiцель жа, своечасова заўважыўшы пешахода на дарозе, пазбягае наезду i яго наступстваў.   — Каб дабiцца максiмальнага эфекту ад выкарыстання флiкераў, iх па магчымасцi трэба прымацоўваць так, каб яны былi бачны з усiх бакоў, — падкрэслiвае старшы iнспектар па агiтацыi i прапагандзе спецыяльнага падраздзялення дарожна-патрульнай службы "Страла" МУС Вольга Амiнава. — А то большасць жанчын прымацоўваюць круглы флiкер на сумачку з аднаго боку i думаюць, што вадзiцель iх убачыць. Тое ж самае тычыцца школьнiкаў i студэнтаў, якiя носяць флiкеры на заплечнiках. Безумоўна, лепш за ўсё выкарыстоўваць адначасова два цi больш святлоадбiвальныя элементы — з правага i левага бакоў. Святлоадбiвальную стужку можна нацягнуць на рукаў цi штанiну, а падвеску прышпiлiць да адзення. Яна павiнна вiсець на вышынi калена з боку праезднай часткi. У гэтым выпадку яна будзе лепш бачна вадзiцелю ў святле фараў.

Штодзень за неабазначэнне сябе ў цёмны час сутак святлоадбiвальным элементам iнспектары ДАI штрафуюць у сярэднiм 350—400 чалавек. Згодна з Кодэксам аб адмiнiстрацыйных правапарушэннях, прадугледжаны штраф у памеры да 17,5 тысячы рублёў. Калi парушэнне здзейснена пешаходам у стане алкагольнага ап’янення, то штраф складзе ад 35 да 105 тысяч рублёў.

Колькасць аштрафаваных за тое, што не абазначылi сябе ў цёмны час сутак: 1.10 — 532, 2.10 — 570, 3.10 — 708, 4.10 — 673, 5.10 — 742, 6.10 — 726.       Чаму вы (не) носіце флiкер?

Аляксандр Мендзелеў, начальнiк ДАІ МУС Беларусi:

"Усе людзi, незалежна ад сацыяльнай ролi, якую яны выконваюць у грамадстве, рухаючыся ў цёмны час сутак па абочыне праезнай часткi знаходзяцца ў небяспецы. I супрацоўнiкi мiлiцыi не выключэнне. Таму флiкер заўсёды пры мне, я прытрымлiваюся думкi, што для таго, каб навучыць нечаму людзей, мне i маiм калегам, у першаю чаргу, трэба пачынаць з сябе. А пасля гэтага з чыстым сумленнем патрабаваць наяўнасцi святлоадбiвальнага элементу ад пешаходаў".

Зiнаiда Флавiянаўна, 45 год, эканамiст:

"Вёска, у якой я жыву, знаходзiцца на адлегласцi 20 кiламетраў ад раённага цэнтра. Таму, зразумела, машын на нашых незаасфальтаваных дарогах нягуста. Узiмку а пятай гадзiне вечара, калi я вяртаюся з работы дадому, на дварэ хоць вока выкалi. Лiхтары не ўсе сем’i запальваюць. Пасля таго, як аднавяскоўцаў пачалi штрафаваць за адсутнасць святлоадбiвальнiкаў, я доўга не раздумвала i набыла флiкеры для сябе i для мужа. Муж, праўда, носiць яго ў кiшэнi, а я прывязала да сумачкi, якая заўсёды са мной".

Наталля Корзун, 19 гадоў, студэнтка медунiверсiтэта:

"Вучыцца на ўрача складаней, чым я думала. На асабiстае жыццё можна забыцца на шэсць гадоў. Прыходжу з пар у гадзiны чатыры i пачынаю рыхтавацца да заўтрашнiх заняткаў. Карыстаюся флiкерам толькi, калi раз на месяц езджу дадому i падчас летнiх канiкулаў. Чапляю яго на руку, калi ў суботу разам з сяброўкам ездзiм на дыскатэку ў суседнюю вёску на веласiпедах".

Соф’я Васiльеўна, 65 гадоў, пенсiянерка:

"Дзецi прывезлi мне гэты флiкер, каб паглядзела хоць што гэта такое. Добра прыдумалi разумныя людзi. А то столькi людзей гiне на дарозе. У маёй суседкi ўнук месяц таму трапiў пад колы машыны. Ды i матацыклiстаў зараз развялося ў вёсцы, носяцца як звар’яцелыя. А мне, старой, флiкер не патрэбны. Ногi ўжо зусiм не тыя, што раней, далей двара нiкуды не хаджу. А прадукты сацыяльны работнiк прыносiць".

Арцём Русецкi, 37 год, дальнабойшчык:

"Я ўвесь час у дарозе, i мая машына аздоблена не адным святлоадбiвальным элементам. Вельмi абураюся, калi ў цёмны час сутак людзi не абазначаюцца флiкерамi. Iм, напэўна, здаецца, што яны бачны, але гэта не так. Як людзям растлумачыць, што яны падстаўляюць не толькi сябе, але i кiроўцаў. Каму хочацца сесцi ў турму нi за што нi пра што?.."

Надзея ДРЫЛА.