Колькі ў небе зор

Источник материала:

Песня — самы дасканалы настаўнiк. У розных выпадках — цi трэба ўславiць любоў, працу, цi навучыць годна ненавiдзець, змагацца за справядлiвасць — яна заўсёды натхняе на жыццестваральную дзейнасць. І адбываецца гэта лагодна, эмацыянальна насычана. Мелодыяй песня яднае з навакольнай прасторай, тым самым напаўняе душы спевакоў i слухачоў пяшчотай, любасцю, замiлаваннем. А тэкстам яна ўзнаўляе гiстарычную памяць, роднiць суайчыннiкаў.

Гэтыя грамадзянска-патрыятычныя адметнасцi песнi даўно запрыкмецiлi арганiзатары сацыяльных рухаў i зрабiлi яе надзейнай памочнiцай. Перадавыя замежныя школы ўключылi песню ў выхаваўчы працэс, выкарыстоўваюць яе як спрактыкаванага псiхолага ў розных жыццёвых сiтуацыях.

Вопыт нашых бацькоў, прадзедаў увесь час падказвае: трэба спяваць! А гэтаму варта вучыцца з маленства, са школы. Калi заспявае школа — заспявае ўся краiна. I на роднай мове, каб быць у суладдзi з роднай зямлёй. I тады ўся навакольная прастора заiскрыцца-заззяе радасцю, засвецiцца шчасцем...

Пра радасць ад суладнасцi з каханай асобаю, з родным краем выказваецца ў песнi "Колькi ў небе зор". Яна ўзнiкла ў сярэдзiне мiнулага стагоддзя. Верш i музыку склаў гродзенскi дзеяч культуры Аляксандр Шыдлоўскi. Грамадскасць цёпла прыняла вакальны твор, напiсаны ў рытме вальса, i ён стаў вельмi папулярным, народным.

Апошняе двухрадкоўе кожнай страфы паўтараецца. Некаторы час канцоўку другой страфы спявалi так: "Дзе так добра жыць, дзе такi прастор, / Шчасця больш у нас, як на небе зор". Аднак першапачатковы варыянт узнавiўся i замацаваўся ў побыце (ён i пададзены ў гэтым тэксце).