ДАЛОНЬКІ на шчасце. Дзiцячае i будучае

Источник материала:

Белыя мiмы — клоўны, фатографы i вiдэааператары, дыджэi, папулярныя тэлевядучыя, спартсмены, журналiсты i "зоркi" эстрады за касамi, паветраныя шарыкi i вялiзнае шаравое "бабл-шоу"... 20 лiстапада ўсе 5 сталiчных рэстаранаў "МакДональдс" ператварылiся ў своеасаблiвыя забаўляльныя пляцоўкi. Такiм чынам у Беларусi ўжо ў сёмы раз праходзiла дабрачынная акцыя "Сусветны дзень дзiцяцi ў МакДональдс".

Увогуле 20 лiстапада па iнiцыятыве ААН адзначаецца Сусветны дзень дзiцяцi. Свой унёсак у яго робiць i кампанiя "МакДональдс", якая праводзiць дабрачынную акцыю не толькi ў Беларусi, але i яшчэ ў больш як 100 краiнах свету, дзе толькi ёсць рэстараны гэтай сеткi. Штогод сабраныя ў лiстападзе падчас акцыi сродкi накiроўваюцца на набыццё абсталявання для дзiцячых дамоў, клiнiк, рэабiлiтацыйных цэнтраў, школ-iнтэрнатаў i радзiльных дамоў.

У Беларусi за шэсць гадоў правядзення акцыi было сабрана каля 130 мiльёнаў рублёў, якiя былi выкарыстаныя на патрэбы Мiнскай школы-iнтэрната № 5, дзiцячага сацыяльнага прытулку, неўралагiчнага аддзялення 3-й дзiцячай клiнiчнай бальнiцы Мiнска, Дзiцячага кардыяхiрургiчнага цэнтра РНПЦ "Кардыялогiя", Мiнскага гарадскога цэнтра медыцынскай рэабiлiтацыi дзяцей з псiханеўралагiчнымi захворваннямi. Сёлета акцыя, якая стартавала 1 лiстапада, накiраваная на дапамогу ўстановам "Дом дзiцяцi № 1" для дзяцей з абмежаваным паражэннем цэнтральнай нервовай сiстэмы i псiхiкi i "Дом дзiцяцi № 2". На ранiцу 20 лiстапада ад продажу бульбы фры i сiмвалiчных бiрулек-далонек "Я дапамог дзецям!" было атрымана ўжо 45 мiльёнаў беларускiх рублёў. Сума немалая. Але i пералiк абсталявання, неабходнага абодвум дамам дзiцяцi, вялiкi: дзiцячыя ложкi, хадункi, прагулачныя каляскi, манежы, камод для цацак, спартыўны комплекс, камп’ютар для ўстаноўкi лагапедычных праграм, кампрэсарны iнгалятар, электрамагнiт, абсталяванне для жылых i гульнявых пакояў, фiзiятэрапеўтычнага кабiнета, кабiнета лагапеда... Цi хопiць на ўсё гэта выручаных сродкаў? "Мы набудзем усё, што ёсць у спiсах, — запэўнiла дырэктар ЗП "Макдональдс Беларусь" Вiкторыя Данько. — Заяўкi гэтыя рабiлiся з улiкам збораў мiнулых гадоў, у iх пералiчана толькi самае неабходнае. Але мы спадзяёмся з дапамогай усiх удзельнiкаў акцыi пабiць леташнi рэкорд у 49 мiльёнаў рублёў, сабраць больш сродкаў, а значыць, набыць больш тэхнiкi i абсталявання. І шчыра спадзяёмся, што гэта абсталяванне зробiць жыццё дзяцей, якiя засталiся без апекi бацькоў, хоць крыху больш камфортным, радасным i светлым".

Прыхiльнiкаў акцыi, дарэчы, год ад году робiцца ўсё больш. Многiя артысты, тэле- i радыёвядучыя ўжо не чакаюць спецыяльнага запрашэння, а самi тэлефануюць з жаданнем устаць за прылавак. Таму 20 лiстапада вялiзныя чэргi ў рэстаранах стаяць не толькi за хуткiм харчаваннем, але яшчэ за аўтографамi — калi яшчэ сустрэнеш у адным месцы алiмпiйскiх чэмпiёнаў, грабцоў Андрэя i Аляксандра Багдановiчаў i кiдальнiцу молата Аксану Мянькову, вiцэ-прэзiдэнта НАК Аляксандра Мядзведзя, акцёра тэатра "Хрыстафор" Яўгена Крыжаноўскага, вiджэя Першага музычнага тэлеканала Вiталя Воднева i многiх iншых папулярных асобаў? Акрамя таго, гэтага дня з нецярпеннем чакаюць выхаванцы многiх школ-iнтэрнатаў i дзiцячых дамоў, для якiх па традыцыi ладзяцца дабрачынныя абеды.

"Я лiчу, што на такую акцыю здольныя толькi сталыя людзi i сталае грамадства, у якiм людзi могуць i хочуць падзялiцца, дапамагчы iншым", — адзначыла галоўны ўрач сталiчнага Дома дзiцяцi № 1 Тамара Мурашова. А вiцэ-прэзiдэнт НАК, трохразовы чэмпiён Алiмпiйскiх гульняў i сямiразовы чэмпiён свету Аляксандр Мядзведзь дадаў, што падтрымка будучага пакалення — вялiкая i важная справа для пабудовы моцнай краiны, i гэта справа абавязкова будзе працягвацца надалей. Так, "МакДональдс" стаў першай кампанiяй, якая заключыла дамову аб супрацоўнiцтве з Нацыянальным алiмпiйскiм камiтэтам, i супрацоўнiцтва гэта доўжыцца ўжо больш як 10 гадоў. Толькi сёлета сумесна былi праведзеныя Адзiны Алiмпiйскi дзень i Мiжнародны дзень бегу, а таксама хакейны турнiр "Кубак МакДональдс".