Калі тавар быў пашкоджаны з-за няякаснага пакета, прадавец абавязаны кампенсаваць урон

Источник материала:

"У магазiне я зрабiў шэраг пакупак. Пры разлiку на касе папрасiў прадаць вялiкi пакет — на 25 кiлаграмаў, як было пазначана на iм — каб упакаваць iх. На вачах касiра склаў усе тавары ў гэты пакет, але як толькi паспрабаваў яго падняць, пакет разарваўся. Толькi цудам нiчога не разбiлася, не пралiлося, хоць агульная вага набытага ў магазiне была ўсяго некалькi кiлаграмаў. Я запатрабаваў, каб мне вярнулi грошы за пакет. Ледзь не са скандалам, але iх аддалi. Цi меў работнiк магазiна права адмовiць мне ў iх вяртаннi? Справа не ў грошах, проста было вельмi няёмка адчуваць сябе ў гэтай сiтуацыi. А калi б з-за няякаснага пакета нешта разбiлася, цi аддалi б мне грошы за сапсаваны тавар, якi каштаваў нашмат больш за той пакет? Паўтаруся, я ж яго набыў у гэтым самым магазiне". З такой просьбай аб кансультацыi на спажывецкую тэму звярнуўся ў рэдакцыю наш чытач.

Як паведамiла нам кансультант упраўлення абароны правоў спажыўцоў i кантролю за рэкламай Мiнiстэрства гандлю Антанiна Палякова, у адпаведнасцi з Законам Рэспублiкi Беларусь "Аб абароне правоў спажыўцоў", прадавец (вытворца) абавязаны прадаставiць спажыўцу неабходную i дакладную iнфармацыю пра тавар. Калi ўзнiкненне недахопу ў тавары (у дадзеным выпадку парваўся пакет) выклiкана непрадастаўленнем (прадастаўленнем недакладнай) iнфармацыi пра тавар, спажывец мае права на вяртанне заплачаных за такi тавар грошай.

У апiсанай сiтуацыi, як дадала суразмоўца, або iнфармацыя аб спажывецкiх якасцях пакета не адпавядала сапраўднасцi (пакет не вытрымаў масу тавару менш за 25 кiлаграмаў), або сам пакет аказаўся няякасным.

— І ў першым, i ў другiм выпадках прадавец абавязаны вярнуць спажыўцу заплачаную за тавар грашовую суму, — сказала Антанiна Васiльеўна. — А калi б прадуктам была нанесена шкода (у вынiку рэалiзацыi няякаснага тавару або прадастаўлення недакладнай iнфармацыi пра тавар), дык прадавец абавязаны таксама кампенсаваць у поўным аб’ёме шкоду, нанесеную спажыўцу або яго маёмасцi.