ЦТ распаўсюдзіцца i на выпускнiкоў базавай школы?

Источник материала:

Нядаўна на базе адной ВНУ аналiзавалася паспяховасць студэнтаў, якiя паступалi па вынiках цэнтралiзаванага тэсцiравання. Iнфармацыя атрымалася вельмi цiкавая: у прыватнасцi, высветлiлася, што iх паспяховасць цалкам карэлюе з вынiкамi, якiя яны прадэманстравалi падчас тэставых выпрабаванняў, i не адпавядае iх школьным атэстатам. Прасцей кажучы, сярэднi бал атэстата можа аказацца вышэйшы цi нiжэйшы за сапраўдны ўзровень падрыхтоўкi выпускнiка, тым не менш ён прыраўноўваецца да экзаменацыйнай адзнакi i нярэдка адыгрывае вырашальную ролю пры сумiраваннi ўсiх балаў. "Дык цi трэба яго захоўваць?" — пацiкавiўся мiнiстр меркаваннем сваiх калег.

"Сярэднi бал школьнага атэстата выратоўвае i школу, i настаўнiка, паколькi прымушае вучня канцэнтраваць сваю ўвагу не толькi на дзвюх-трох школьных дысцыплiнах, неабходных для паступлення", — агучыў свой погляд па гэтым пытаннi першы намеснiк мiнiстра Аляксандр Жук, i зала яго падтрымала.

— А цi трэба нам захоўваць раздзельны конкурс памiж абiтурыентамi ў гарадской i сельскай мясцовасцi? — запытаўся мiнiстр. — Тым больш, што некалькi апошнiх гадоў назiраецца тэндэнцыя зблiжэння прахадных балаў выпускнiкоў сельскiх i гарадскiх устаноў адукацыi.

Сёлета ў 33 ВНУ пры залiчэннi на кожную другую спецыяльнасць (маецца на ўвазе дзённая бюджэтная форма навучання) прахадныя балы выпускнiкоў сельскiх устаноў адукацыi аказалiся аднолькавыя цi нават перавышалi прахадныя балы абiтурыентаў-гараджан. Значыць, узровень падрыхтоўкi выпускнiкоў, якiя навучаюцца ў сельскiх i гарадскiх установах адукацыi, паступова выраўноўваецца. Члены калегii прыйшлi да высновы, што праз нейкi час неабходнасць у раздзельным конкурсе i сапраўды цалкам знiкне, але пакуль што неабходна пакiнуць дадатковую "страхоўку" для абiтурыентаў з сельскай мясцовасцi. Дарэчы, сёлета колькасць сельскай моладзi павялiчылася сярод першакурснiкаў да 20 працэнтаў.

Аляксандр Жук агучыў некаторыя прапановы Дзяржаўнай камiсii па кантролi за ходам падрыхтоўкi i правядзеннем уступных iспытаў наконт будучай прыёмнай кампанii. Па-першае, у 2009 годзе пры рэгiстрацыi ўдзельнiкаў цэнтралiзаванага тэсцiравання плануецца ўкаранiць аўтаматызаваную iнфармацыйную сiстэму, якая дазволiць ствараць штогод адзiную электронную базу звестак аб свабодных месцах у пунктах правядзення ЦТ, аўтаматызаваць працэс рэгiстрацыi i наладзiць работу пунктаў рэгiстрацыi па прынцыпе "аднаго акна". Над стварэннем гэтай сiстэмы ўжо працуюць Рэспублiканскi iнстытут кантролю ведаў, Галоўны iнфармацыйна-аналiтычны цэнтр Мiнiстэрства адукацыi i Беларускi дзяржаўны ўнiверсiтэт iнфарматыкi i радыёэлектронiкi.

Па-другое, патрабуе вывучэння пытанне аб выкарыстаннi цэнтралiзаванага тэсцiравання ў якасцi ўступных выпрабаванняў для выпускнiкоў базавай школы, якiя будуць паступаць у сярэднiя спецыяльныя навучальныя ўстановы.

— Мы лiчым, што трэба паставiцца да гэтага даручэння з усёй адказнасцю i знайсцi адказ на галоўнае пытанне. А цi гатовы выпускнiкi базавай школы да дадзенай формы кантролю ведаў i цi не знiзiцца пры гэтым узровень iх падрыхтоўкi? — падкрэслiў Аляксандр Жук.

Акрамя таго, у адпаведнасцi з Комплексам мераў па замацаваннi квалiфiкаваных кадраў у вёсцы плануецца ўнясенне дапаўненняў у правiлы прыёму ў ВНУ i сярэднiя спецыяльныя навучальныя ўстановы. У прыватнасцi, на спецыяльнасцях сельскагаспадарчага профiлю мяркуецца павялiчыць квоту мэтавага набору да 30 працэнтаў ад кантрольных лiчбаў прыёму i прадаставiць установам адукацыi магчымасць запаўняць мэтавыя месцы пры конкурсе адзiн чалавек на месца. А таксама пашырыць пералiк асобаў, якiя змогуць прэтэндаваць на мэтавую падрыхтоўку: даць такую магчымасць абiтурыентам, якiя пражываюць у населеных пунктах з колькасцю насельнiцтва да 20 тысяч чалавек.

Аляксандр Жук агучыў таксама прапанову ўвогуле адмовiцца ад устанаўлення нiжняй мяжы тэставага бала. Для абiтурыентаў i iх бацькоў незразумела, чаму на розных дысцыплiнах гэта мяжа вар’iруецца ад 8 да 18 балаў.

— На нашу думку трэба выдаваць сертыфiкаты ўсiм удзельнiкам ЦТ, якiя атрымалi 1 бал i больш. Гэта дазволiць зняць дадатковае напружанне сярод абiтурыентаў i павялiчыць iх шанцы пры выбары прафесii i навучальнай установы. Улiчваючы, што гэта рэйтынгавая сiстэма, i конкурсны адбор змогуць прайсцi ўсё роўна лепшыя з лепшых, захаванне нiжняй мяжы тэставага бала мы лiчым немэтазгодным, — падкрэслiў Аляксандр Жук. — Тым больш не варта забываць, што ўдзельнiкi ЦТ паступаюць не толькi ў ВНУ, але i ў сярэднiя спецыяльныя навучальныя ўстановы ў вiртуальнай прасторы. А мы частку з iх адразу пазбаўляем такой магчымасцi.

Той жа думкi прытрымлiваецца i дырэктар Рэспублiканскага iнстытута кантролю ведаў Мiкалай Фяськоў. Але мiнiстр усё ж такi сумняваецца:

— Мне здаецца, што гэта планка з’яўляецца своеасаблiвым сiгналам, што вышэйшая адукацыя — не для ўсiх, — патлумачыў сваю пазiцыю Алякcандр Радзькоў. — Таму асабiста я пакуль супраць адмены абмежаванняў.

Была агучана на калегii i яшчэ адна цiкавая прапанова — распрацаваць камп’ютарную сiстэму, якая дазволiць размяркоўваць абiтурыентаў, у залежнасцi ад набраных балаў, памiж вышэйшымi навучальнымi ўстановамi. Схематычна гэта выглядае прыкладна так: абiтурыент заяўляе свае балы, i яму паведамляюць, цi зможа ён прайсцi з iмi ў тую цi iншую навучальную ўстанову. I не трэба бегаць памiж прыёмнымi камiсiямi, спрабаваць пралiчыць свае шанцы на паступленне. Такi вопыт ёсць у многiх заходнiх краiнах. Затое знiкне праблема апошняга дня падачы дакументаў.

— Мы будзем рухацца ў гэтым напрамку паэтапна, — паведамiў Аляксандр Жук, — таму што гэта азначае поўную перабудову работы нашых прыёмных камiсiй. Тут ёсць праблемы i арганiзацыйнага, i псiхалагiчнага плана. Зразумела, што да такiх рэвалюцыйных зменаў трэба падрыхтаваць i грамадскую думку...