Ад лямпачак напальвання мы яшчэ доўга не адмовімся

Источник материала:

У Мiнiстэрстве прамысловасцi гэтай навiне не здзiвiлiся: "Такiя заявы гучаць ужо апошнiя гадоў 5. І што? Паглядзiце, звыклыя лямпачкi напальвання мы выкарыстоўваем дагэтуль. Хоць у краiне ўжо распачалася вытворчасць i энергазберагальных лямпачак — на адзiным электралямпавым заводзе ў Брэсце".

Намеснiк дырэктара па вытворчасцi РУП "Брэсцкi электралямпавы завод" Леанiд Хомчанка пацвердзiў гэтую iнфармацыю i даў па нашай просьбе невялiкi каментарый.

— Iдзе праца па запуску лiнii па зборцы энергазберагальных лямпачак. Камплектавыя часткi да нас паступаюць з-за мяжы. У мiнулым месяцы была выпушчана першая партыя — каля 30 тысяч штук, у снежнi плануем вырабiць яшчэ адну партыю. Паводле спектра святла лямпачкi ёсць i "цёплыя" i "халодныя". Апошнiх пакуль было выпушчана крыху больш, таму што было закуплена болей адпаведных камплектавых частак. Гарантыйны тэрмiн на нашы энергазберагальныя лямпачкi складае 8 тысяч гадзiн. Да прыкладу, у звычайнай лямпачкi напальвання ён не перавышае адной тысячы гадзiн. Цана ў крамах у залежнасцi ад магутнасцi — ад 12 да 15 тысяч рублёў, — сказаў Леанiд Мiкалаевiч.

Каментуючы ўвогуле iнфармацыю пра паступовую замену ў Еўропе лямпачак напальвання на энергазберагальныя, суразмоўца заўважыў, што ў найблiжэйшай i нават аддаленай перспектыве не толькi Беларусь, але i iншыя краiны былога Савецкага Саюза наўрад цi адмовяцца цалкам ад выкарыстання першых.

— Такiя лямпачкi выпускалiся ў вялiкiм асартыменце, адпаведна, была i дагэтуль ёсць вялiкая колькасць электрапрыбораў, да якiх патрэбныя менавiта звычайныя лямпачкi напальвання,.у тым лiку розных бытавых прыбораў — зазначыў Леанiд Хомчанка. — У Еўропе крыху iншая сiтуацыя з гэтым. Разам з тым варта сказаць, што ў свеце выкарыстоўваюцца i iншыя крынiцы святла, напрыклад, светладыёды. Хто ведае, можа, з цягам часу мы ў масавым парадку пяройдзем ад выкарыстання лямпачак напальвання да нейкiх iншых эфектыўных крынiц святла.