Беларускае рэха ў Сант’яга

Источник материала:

Творчая група Алега Лукашэвiча, дарэчы, працавала над серыяй дакументальных фiльмаў пра Дамейку на працягу двух гадоў. Дзеля таго, каб прасачыць усе павароты лёсу героя, журналiстам давялося весцi здымкi ў Беларусi, Вялiкабрытанii, Францыi, Германii, Бразiлii i Чылi. Менавiта ў апошняй краiне Iгнат Дамейка правёў вялiкую частку жыцця, стаў яе ганаровым грамадзянiнам, рэктарам унiверсiтэта ў Сант’яга i, можна сказаць, нават нацыянальным героем. Дагэтуль у Чылi ёсць горад i горны хрыбет у Кардыльерах, названыя iмем Дамейкi — гэтаксама як серыя мiнералаў, вiд фiялкi, выкапнёвы малюск, адкрытая чылiйскiм астраномам малая планета.

Зрэшты, у космасе здымачная група па зразумелых прычынах пабываць не змагла, а вось дом у Сант’яга, дзе жыў славуты вучоны, адшукала, таксама як i яго прамых спадчыннiкаў. Карэспандэнты Белтэлерадыёкампанii пабывалi на шахтах серабра i медзi, размешчаных у 500 км ад горада, i высветлiлi, што частка гэтых шахтаў, якiя адкрыў у ХIХ стагоддзi наш зямляк, дагэтуль дзейныя. Стваральнiкi шмат працавалi i з архiвамi, адшукваючы рэдкiя фатаграфii i дакументы, некаторыя з якiх публiка ўбачыць упершыню — як, напрыклад, выдадзены ў 1884 годзе Расiйскай iмперыяй дазвол на прыезд Дамейкi на радзiму.

Мiж iншым, у Беларусi, непадалёк ад пасёлка Мiр, захаваўся фундамент сядзiбы, дзе нарадзiўся Iгнат Дамейка. Нашчадкi спадзяюцца, што яе адновяць, а наваколле i без таго добра захавалася — праўнук навукоўца Пабла Дамейка Перэс, якi наведваў Беларусь некалькi гадоў таму, сцвярджае, што пейзаж на карцiне прадзеда, якая захоўваецца ў Сант’яга, да самых дробных дэталяў супадае з убачаным ля сядзiбы...

Цалкам серыя фiльмаў пра Iгната Дамейку будзе паказаная на Першым канале з 27 па 30 студзеня ў вячэрнiм эфiры.