Беларусы выбралі прадукты года

Источник материала:

Вынiкi конкурсу "Прадукт года 2008" агучылi ўчора арганiзатары конкурсу ў межах ІII харчовага бiзнэс-форуму. Пераможцы ў больш за васьмiдзесяцi намiнацыях харчовых тавараў былi вызначаны падчас агульнарэспублiканскага сацыялагiчнага даследавання, праведзенага лабараторыяй "Новак". Спецыялiсты апыталi 1200 чалавек рознага ўзросту i сацыяльнага становiшча на прадмет iх улюбёных харчовых тавараў ва ўсiх беларускiх гарадах з насельнiцтвам больш за 50 тысяч чалавек. Прычым людзям трэба было выбiраць не са спiсу прапанаваных тавараў, а самiм называць любiмую смятану цi хлеб.

Такiм чынам, калi хочаце зрабiць, напрыклад, самы лепшы бутэрброд 2008 года, то адрэжце лустачку хлеба "Нарачанскага", намажце яго маслам "Бярэсце", пакладзiце зверху кавалачак кiлбаскi Ваўкавыскага мясакамбiната i налiце ў кубачак малака або кефiру "Савушкiн прадукт".

На адкрыццi форума намеснiк мiнiстра эканомiкi Андрэй Тур адзначыў:

— Гэты бiзнэс-форум праходзiць не ў вельмi просты час, нават нягледзячы на тое, што мы дастаткова паспяхова завяршылi мiнулы год i па ўсiх макраэканамiчных паказчыках, акрамя двух, не толькi выканалi прагнозныя паказчыкi, але i перавыканалi iх. I, што самае галоўнае, сельская гаспадарка таксама за доўгiя гады перасягнула прагнозныя стаўкi свайго развiцця. Але з другога боку, цяперашнi год вельмi-вельмi няпросты, бо на нас сур’ёзны ўплыў робiць фiнансава-эканамiчны сусветны крызiс. Быццам бы i пагрозы рынку харчавання няма, бо ўсе людзi есцi хочуць, але ўсё ж-такi i праблемы будуць няпростыя.

Андрэй Мiкалаевiч абазначыў перад прысутнымi вытворцамi тры аспекты, якiя трэба ўлiчваць пры гаспадарчай дзейнасцi ў 2009 годзе. Па-першае, шмат што будзе залежаць i ад самiх вытворцаў, ад таго, як яны змогуць насыцiць рынак харчовых тавараў па асартыменце i якасцi i тым самым стварыць камфортны асяродак для спажыўцоў. Па-другое, намеснiк мiнiстра эканомiкi папярэдзiў, што агульная палiтыка iмпартазамяшчэння можа закрануць i вытворцаў, напрыклад, што датычыць сыравiны цi новага абсталявання, Тут жа ён i нагадаў вытворцам, што перад iмi стаiць вялiкая задача па-максiмуму пашырыць экспарт. Ну i нарэшце, Андрэй Тур звярнуў увагу на трэцюю ўмову, якая закране фiрмы ў сувязi з крызiсам, — гэта памеры i аб’ёмы крэдытавання:

— Якасная прадукцыя, добрыя маркетынг i брэнды ды высокi ўзровень развiцця — гэта будзе залог наяўнасцi ў вас зваротных сродкаў для знiжэння нагрузкi крэдытавання.

Дарэчы, у гутарцы з журналiстамi Тур прызнаўся, што сам купляе ў асноўным беларускiя харчы:

— Хлеб я купляю беларускi, малако нашае, сыр, мяса, калбасу таксама. Ну, морапрадукты, вы ў самой назве бачыце, што мора ў нас няма... Было б мора, то i iх купляў бы свае. Вiно? Неяк не звяртаў увагi... Хутчэй за ўсе, неяк традыцыйна склалася, што або iтальянскiя або iспанскiя вiны. Вось шампанскае — нашае. Гарэлку, калi п’ём — таксама нашу.