Тэхнiка часоў Вялiкай Айчыннай пакiдае сталiцу

Источник материала:

На адкрытай пляцоўцы музея Вялiкай Айчыннай вайны ўчора праводзiўся дэмантаж экспазiцыi вайсковай тэхнiкi часоў Другой сусветнай. Як паведамiў Мiхаiл Скарынка, намеснiк дырэктара музея, пераезд тэхнiкi звязаны з будаўнiцтвам на гэтым месцы гасцiнiчнага комплексу:

— Гэтая тэхнiка паедзе ў Станькава, дзе праходзiла старая савецкая мяжа. Там будзе фiлiял нашага музея, так што з музейнага фонду тэхнiка не выключаецца. Па Указу Прэзiдэнта Беларусi № 241 ад 9 мая 2008 года тут, на старым месцы, будзе будавацца гасцiнiчны комплекс, i таму ёсць такое паняцце, як зносiмыя збудаваннi. Пляцоўка ваеннай тэхнiкi — гэта ў першую чаргу. Пра лёс самога музея нiчога сказаць не магу: цi будзе ён тут, цi пераедзе на часовыя плошчы. Гэтае пытанне "з барадой" i доўга абмяркоўвалася ў маштабах горада...

Учора на свежым паветры яшчэ стаялi тры танкi i самалёт без крылаў. А таксама дзве загружаныя для пераезду самаходкi. Калi не будзе замiнак, то да канца тыдня, па словах Мiхаiла Скарынкi, тэхнiка пераедзе ў Станькава.