Праблема з запчасткамi да мапеда нарэшце будзе вырашана?

Источник материала:

24 студзеня на старонках газеты быў надрукаваны ліст чытача Мікалая Фёдаравіча Жукоўскага з вёскі Сіняўка Клецкага раёна "Мы не такія багатыя, каб праз два гады выкідваць мапед на звалку". Нагадаем, што наш заяўнік у кастрычніку 2006 года набыў гэты сродак перасоўвання вытворчасці Мінскага мотавелазавода. Пакуль дзейнічала гарантыя, ніякіх праблем у вяскоўца не ўзнікала. Аднак калі яна скончылася і "паляцеў" тармазны барабан...

На момант звароту ў рэдакцыю Мікалай Фёдаравіч ужо тры месяцы стаяў у чарзе ў краме ад прадпрыемства на атрыманне патрэбнай запасной часткі. А іх у гандлёвае прадпрыемства ўсё ніяк не пастаўлялі. Як тлумачылі напачатку самому чытачу, а потым і нам работнікі крамы, такая сітуацыя склалася з-за таго, што на той момант завод ужо некалькі месяцаў не працаваў. Больш за тое, мадэль мапеда, якую некалі набыў чытач, знялі з вытворчасці...

Нас праінфармавалі, што адкрытае акцыянернае таварыства "МОТАВЕЛА" выйшла з ліку арганізацый, падведамасных Міністэрству прамысловасці, яшчэ ў жніўні 2007 года ў сувязі з продажам дзяржаўнай долі акцый гэтага акцыянернага таварыства. Уласнікам ААТ "МОТАВЕЛА" называлася прадстаўніцтва "АТЕС GmbH" у Рэспубліцы Беларусь.

Нарэшце выканаўца абавязкаў дырэктара матацыклетнай кампаніі "Мінск-мота" (гэта гандлёвая кампанія прадстаўніцтва) Андрэй Малейчык паведаміў нам наступнае.

— Патрэбны вашаму заяўніку вузел — тармазны барабан — асобна не прадаецца. Набыць яго можна толькі ў зборцы з усім колам, якое каштуе зараз 161 тысячу рублёў. У краму пры прадпрыемстве, куды ўжо звяртаўся ваш заяўнік раней, патрэбныя запчасткі паступяць недзе на працягу месяца (мы ўжо раней гаварылі, што каб не марнаваць час і грошы на дарогу, лепш перад вандроўкай у сталіцу патэлефанаваць у краму і пераканацца, што наяўнасць там патрэбнага тавару гарантаваная. — С.Р.). Мадэль, якую раней набыў ваш чытач, з невялiкiмі змяненнямi зноў вернута ў вытворчасць...