Адбіткi пальцаў для пашпарта?

Источник материала:

Дэпутаты профiльнай камiсii Палаты прадстаўнiкоў абмеркавалi пагадненне ў рамках СНД па супрацоўнiцтве ў стварэннi дзяржаўных iнфармацыйных сiстэм пашпартна-вiзавых дакументаў новага пакалення. Яго плануецца разгледзець на чарговай восеньскай сесii (магчыма ў кастрычнiку).

Як паведамiў парламентарыям падчас пасяджэння мiнiстр унутраных спраў Анатоль Куляшоў, ратыфiкацыя пагаднення дазволiць павысiць эфектыўнасць барацьбы з пагрозай тэрарызму i незаконнай мiграцыяй, удасканалiць пашпартна-вiзавы кантроль. З'яўленне новай пашпартна-вiзавай сiстэмы дазволiць затрымлiваць людзей, аб'яўленых у мiжнародны вышук, а таксама спросцiць iдэнтыфiкацыю асобы — запэўнiў кiраўнiк ведамства. "Сёння мы маем доследны ўзор бiяметрычнага пашпарта без адбіткаў пальцаў. Калi дзейны пашпарт каштуе грамадзянам 17,5 тысячы, то новы бiяметрычны будзе ў межах 5 долараў", — адзначыў спадар Куляшоў. Мiнiстр мяркуе, што бiяметрычны пашпарт будзе ўводзiцца ва ўжытак па заяўным прынцыпе — па жаданнi грамадзянiна, прынамсi на першапачатковым этапе. Аднак тут жа дадае, што пашпарт новага ўзору стане абавязковым для кожнага, хто выязджае за мяжу. Пакуль невядома дакладна, якiя менавiта параметры стануць абавязковымi для бiяметрычных звестак, што трапяць у адзiную базу ў межах СНД (пасля ратыфiкацыi пагаднення ўсе дэталi будуць прапрацоўвацца). Заходнiя краiны выкарыстоўваюць розныя iдэнтыфiкатары: адпячаткi пальцаў, выяву радужнай абалонкi вока i iншыя звесткi, якiя характарызуюць фiзiялагiчныя асаблiвасцi чалавека i дазваляюць устанавiць яго асобу. Мiнiстр мяркуе, што ў беларускiм варыянце могуць быць уведзены лiчбавы фотаздымак, электронны подпiс i адбіткi пальцаў.