Забараніце сваім дзецям купацца без нагляду дарослых

Источник материала:

Першы месяц лета здзіўляе сваім зменлівым надвор’ем. Дажджлівыя хмарныя перыяды, калі на двор не выйдзеш без курткі, змяняюцца гарачынёй і задухай, часам нават на працягу аднаго дня. І вядома, калі становіцца спякотна, то многія шаркаўчане, асабліва дзеці, спяшаюцца купацца на пляж. У сувязі з гэтым старшыня раённага таварыства выратавання на вадзе Уладзімір Валер’евіч КАТОВІЧ звяртаецца да нашых чытачоў з просьбай быць асабліва пільнымі падчас адпачынку каля вады.

— Як толькі пачалося лета, адразу ж з’явіліся навіны пра шматлікія выпадкі ўтапленняў, — кажа ён. — І сярод іх  ці не палова, калі ахвярамі вады становяцца дзеці і падлеткі. Каб папярэдзіць трагедыю, якая можа здарыцца з любым у любы момант, бацькі павінны катэгарычна забараніць сваім маленькім дзецям купацца без нагляду дарослых. Падчас купання дарослыя павінны ўважліва сачыць за тым, каб дзеці не адплывалі далёка ад берага. У нашай рацэ Дзісна даволі моцнае цячэнне, якое можа імгненна знесці няўмелага плыўца. Абавязкам дарослых з’яўляецца патлумачыць элементарныя правілы бяспекі пры знаходжанні на вадзе. Нагадваю, што ў Шаркаўшчыне адпачыць каля вады можна на пляжы па вуліцы Вадап’янава, дзе працуе выратавальны пост. Купацца ў іншых месцах не рэкамендуецца.

Андрэй БУРЭЦ.