У Беларусі запланавана стварэнне электроннай копіі архіва і бібліятэкі роду Сапегаў

Источник материала:

Пра гэта паведаміў старшыня Нацыянальнай камісіі Беларусі па справах ЮНЕСКА, пасол па спецыяльных даручэннях МЗС Уладзімір Шчасны 5 лютага на брыфінгу ў Мінску.

«Асноўная частка дакументаў знаходзіцца ў бібліятэках і архівах Санкт‑Пецярбурга. Будзем весці перамовы аб тым, каб зрабіць копіі і перапіс таго, што там знаходзіцца», — сказаў ён.

Паводле слоў Шчаснага, усебаковую дапамогу ў рэалізацыі праекта, у тым ліку фінансавую, будзе аказваць ЮНЕСКА.

«ЮНЕСКА выдзеліць 15 тыс. даляраў на першы этап. Які аб’ём працы атрымаецца ажыццявіць на гэтым этапе, высвятляць спецыялісты пасля наведвання бібліятэк і архіваў Санкт‑Пецярбурга, — сказаў пасол. — Удзел ЮНЕСКА ў такіх праектах надае ім асаблівую значнасць, а ўладальнікі культурных каштоўнасцяў лягчэй ідуць на кантакт».

Шчасны адзначыў, што пры садзейнічанні ЮНЕСКА ўжо рэалізуецца праект «Архіў Радзівілаў», які стаў першым дакументальным комплексам, што прадстаўляе Беларусь у рэестры ЮНЕСКА «Памяць свету».

Пасол падкрэсліў, што МЗС ужо некалькі гадоў займаецца пытаннямі вяртання культурных каштоўнасцяў у краіну. «Але гэта цяжка дасягальная апошнім часам мэта, бо ніхто не хоча вяртаць гэтыя каштоўнасці. Напрыклад, усе спробы вярнуць якія‑небудзь культурныя каштоўнасці з Расіі беспаспяховыя і прыводзяць толькі да таго, што дамаўляемся пра сумеснае выкарыстанне. І гэты шлях пакуль найбольш эфектыўны», — сказаў дыпламат.

Акрамя таго, адзначыў Шчасны, МЗС працуе над стварэннем лічбавай базы звестак знешніх сувязяў Беларусі пачынаючы з XII стагоддзя. «Цяпер мы падрыхтавалі базу па ХХ стагоддзі. Туды ўключаныя дакументы, якія ўсім вядомыя, але захоўваліся не ў нас — напрыклад, Рыжская і Брэсцкая дамовы», — сказаў ён.