50 год мастаку Сержуку Цімохаву

Источник материала:

Цімохаў нарадзіўся ў 1960 годзе ў вёсцы Кротаў Калінкавіцкага раёна Гомельскай вобласці. Пасля заканчэння Мінскага мастацкага вучылішча імя Аляксея Глебава і Беларускай дзяржаўнай акадэміі мастацтваў працаваў у Гомельскім і Віцебскім мастацкіх камбінатах. З 1989 года — галоўны мастак Полацка (Віцебская вобласць), з 1992 года — заснавальнік і дырэктар полацкай галерэі «Рыса».

Як адзначаюць мастацтвазнаўцы, у сваіх творах Цімохаў імкнецца ўвасобіць першаасновы быцця беларусаў, іх язычніцкія традыцыі, фантасмагорыі і касмаганізм праз сімвалічнасць зместу і формы, суразмернасць фактурнасці, выяўленчасці і абстрагаванай умоўнасці, жывапіснасць і тонкія колеравыя спалучэнні. Мастак працуе ў станковым жывапісе і графіцы, манументальна-дэкаратыўным мастацтве. Творы Цімохава знаходзяцца ў музеях Беларусі, Вялікабрытаніі, Германіі, Расіі і Польшчы. З’яўляецца лаўрэатам II Міжнароднага Шагалаўскага пленэру (1997), уладальнікам Гран-пры VII Міжнароднага біенале ілюстрацыі «Залатое пяро Бялграда» (2003) і лаўрэатам I Беларускага біенале жывапісу, графікі і скульптуры (2008). Аўтар 17 персанальных выстаў у Беларусі, Германіі, Польшчы і Сербіі.

У інтэрв’ю БелаПАН першы намеснік старшыні БСМ Рыгор Сітніца назваў Цімохава «адным з лідараў сучаснага беларускага выяўленчага мастацтва, вельмі яркім мастаком са сваім аўтарскім пазнавальным стылем, што і адрознівае мастака ад рамесніка». «Паводле слоў Сітніцы, гэты стыль угрунтаваны менавіта на нацыянальных традыцыях, на моцнай акадэмічнай прафесійнай школе. «Разам з тым Цімохаў убірае ў сябе мастацкі досвед усяго свету, што дае вельмі нечаканы, яркі і высакаякасны мастацкі вынік», — падкрэсліў Сітніца. Паводле яго слоў, юбіляр — гэта чалавек, які нетаропка, паступова, вельмі ўпэўнена і грунтоўна падымае сябе па лесвіцы мастацкай дасканаласці.

«Я люблю ўсё, што ён робіць, з вялікім захапленнем сустракаю кожны яго новы твор і заўсёды чакаю адкрыццяў і прыемнай нечаканасці. Тым больш, што мы з ім землякі — палешукі і аднадумцы ў грамадскіх, мастацкіх і маральных арыенцірах», — сказаў Сітніца.

Ён назваў Цімохава «выдатным арганізатарам», які праявіў свае здольнасці і ў кіраўніцтве БСМ.