Cтынг, памяркоўны рызыкант

Источник материала:

Ён мяняе стылі як пальчаткі, яго імя — устойлівы брэнд. Ён выдатна ведае, што прадае: рамантычнасць, пяшчоту і спелую сэксуальнасць. Хіліцца да сталай аўдыторыі, якая ў курсе ўсіх людскіх перажыванняў, але для дуэтаў запрашае маладых рэпераў і спевакоў.

Усё гэта Стынг, памяркоўны рызыкант.

Шавец з ботамі

Так, Стынг — басіст, які рэдка грае на басе, і рокер, які рэдка грае рок. Пасля росквіту гурта Police ў 1984­м Стынг звярнуўся да сольнай кар’еры. Кінуў гуляцца ў наватара і стаў іграць на сутыку стыляў: джазу, шансону і этнічнай папсы. Рокеры «паважалі дзядзьку» за песню Roxanne, аматары ж попу пранікліся наскрозь лірычным Shape of My Heart / «Абрыс майго сэрца».

Стынг адчувае час: гэтак, у 1985 годзе ён уразіў усіх песняй з першага, плацінавага, альбома Dream of the Blue Turtles, Russians/«Расійцы». Псеўдасімфанічны саўнд з папулярнымі на той час украпленнямі з савецкіх радыёэфіраў. У тэксце ж, ужо не надта мудруючы, Стынг выявіў страх сярэдняга заходнееўрапейца перад ядзерным ударам і выказаў усеагульнае спадзяванне, што «савецкія людзі таксама любяць сваіх дзетак».

А яшчэ песня They Dance Alone/«Яны танчаць адны», напісаная Стынгам у памяць аб ахвярах чылійскіх рэпрэсіяў.

І на дудзе ігрэц

Пасля Стынг зняўся ў блокбастары. «Карты, грошы, дзве рулі» прынеслі Гаю Рычы славу кінападрыўніка. Стынг засвяціўся ў фільме некалькі хвілін, але на ўсіх афішах пісаўся ўпоравень з паўвядомымі акцёрамі. Публіка ішла на Стынга, а атрымлівала файны фільм (без Стынга).

Стынг ведае формулу поспеху, але не заўсёды пільнуецца яе. Ну, навошта ён палез у 2007 годзе спяваць перад узбекскім дыктарам Ісламам Карымавым? У якасці процівагі варта зазначыць, што цягам трыццаці гадоў Стынг дапамагаў праваабарончай арганізацыі Amnesty International і ўласнымі фунтамі ратаваў трапічныя нерушы Бразіліі.

Вынік неўтаймаваных блуканняў Стынга: музычная насычанасць са стылістыч­нымі дамешкамі з усіх куткоў свету і часцяком нетрывіяльныя тэксты песень. Пошук часам няўдалы, але публіка заўсёды можа ацаніць сам факт пошуку. Публіка прыходзіць на яго канцэрт, як на алімпійскія спаборніцтвы, каб убачыць, у якую сёння позу паставіць Стынг гэтыя няшчасныя сем нот і якія экзатычныя інструменты і падпявалы яму дапамогуць у гэтым.

20 верасня Стынг будзе першым, хто выпрабуе траву на познанскім стадыёне перад Чэмпіянатам Еўропы па футболе, які адбудзецца ў Польшчы і Украіне ў 2010­м. Два дні да гэтага на прадмет прафпрыдатнасці ён пратэстуе будучую гаспадыню Чэмпіянату па хакеі — 2014, «Мінск­Арэну».

***

18 верасня. «Мінск-Арэна» (пр.Пераможцаў, 111). Стынг (Гордан Самнер) у суправаджэнні каралеўскага філарманічнага аркестра. з праграмай «Сімфонісіці» і найлепшымі песнямі.

Пачатак а 20-й.

Квіткі ад 120 000 да 1 500 000.