«Мумій тролль» ды «Воплі Відаплясава» заспяваюць па-беларуску

Источник материала:

У межах музычнага праекта "Перазагрузка-2", які стартуе 8 верасня, шэраг замежных гуртоў праспяваюць свае хіты па-беларуску. Сярод іх — расійскі калектыў "Мумій Троль" і ўкраінскі гурт "Воплі Відаплясава". Арганізатарамі з`яўляюцца кампанія "Будзьма беларусамі" і музычны інтэрнэт-партал "Тузін гітоў".

"Перазагрузка-2" будзе працягам праекта, распачатага два гады таму, аднак гэтым разам ён выйшаў за межы Беларусі. Як паведаміў БелаПАН рэдактар партала "Тузін гітоў" Сяргей Будкін, усяго ў праекце возьмуць удзел 12 выканаўцаў. Пачынаючы з 8 верасня на сайтах "Тузін гітоў" і "Будзьма беларусамі" штодня будзе з`яўляцца новая песня разам з каментарыямі выступоўцаў і гісторыяй стварэння музычнай кампазіцыі. Права адкрыць праект атрымаў гурт "Воплі Відаплясава".

"Мы вырашылі пакуль "спаліць" толькі двух выканаўцаў, — адзначыў Будкін. — Будзем выстаўляць па песеньцы на дзень, бо хочацца такую інтрыжку патрымаць".

Рэдактар партала паведаміў, што зараз рыхтуецца дыск, які мусіць быць выдадзены ў наступным месяцы, "пасля таго як будуць прэзентаваны ўсе песні". "Дыск мы прадаваць не будзем, толькі распаўсюджваць бясплатна па культурных установах за межамі Беларусі, натуральна, разыгрываць на нейкіх конкурсах, сваіх канцэртных акцыях", — дадаў Будкін.

Ідэя праекта, паводле яго слоў, — "даць беларускае жыццё добра вядомым і любімым песням". Яго дэбют два гады таму быў накіраваны на выканаўцаў з Беларусі, сёлета аб`ядноўвае аўтараў, якія "маюць беларускія карані ці проста звязаны сяброўскімі пачуццямі з нашай краінай". "Гэтым мы жадаем прыцягнуць увагу да беларускай мовы і засведчыць, што яна абсалютна жывая і ніколі не знікне", — рэзюмаваў рэдактар "Тузіна гітоў".

Адзначаецца, што артысты самі вызначалі, якія свае хіты яны выканаюць па-беларуску. У праекце ўзялі ўдзел "вядучыя беларускія перакладчыкі, якія пераасэнсоўвалі твор на беларускі лад".

У "Перазагрузцы-2" хіты набылі "новы, нечаканы сацыяльны кантэкст". "Матэрыялы праекта раскрыюць таямніцы таго, хто з музыкаў сутыкаўся з мафіяй па-беларуску і ці магчыма яе спыніць, першае каханне каго з заслужаных артыстаў Расіі адбылося ў Мінску і хто ўпершыню за трыццаць гадоў кар`еры заспяваў на беларускай мове", — кажуць арганізатары.