Сёлета ЕБРР не будзе фінансаваць Беларусь

Источник материала:

Сёлета Беларусь засталася без праектаў і фінансавання Еўрапейскага банка рэканструкцыі і развіцця.

Хаця мінулы год быў адзначаны рэкорднай актыўнасцю ў гісторыі ўзаемаадносінаў гэтай міжнароднай фінансавай арганізацыі і Беларусі.

Міжнародная фінансавая карпарацыя, Еўрапейскі банк рэканструкцыі і развіцця і іншыя міжнародныя фінансавыя структуры нароўні з прыватнымі інвестарамі з"яўляюцца важнымі крыніцамі рэсурсаў для эканомік шмат якіх краінаў у стадыі развіцця.

Дзейнасць ЕБРР, створанага для падтрымкі рынкавых рэформаў у 29 краінах, распаўсюджваецца ад Цэнтральнай Еўропы да Цэнтральнай Азіі. Гэта адзін з найбуйнейшых інвестараў у рэгіёне, які апроч вылучэння сваіх сродкаў прыцягвае значныя аб"ёмы прамых замежных інвестыцыяў. Структура ўкладае капітал галоўным чынам у прыватныя прадпрыемствы, як правіла, сумесна са сваімі камерцыйнымі партнёрамі. Пры гэтым інвестыцыі ідуць як у новыя вытворчасці, так і ў дзеючыя фірмы. ЕБРР таксама працуе з дзяржаўнымі кампаніямі ў мэтах падтрымкі працэсаў прыватызацыі і структурнай рэарганізацыі, а таксама ўдасканалення камунальнай гаспадаркі.

Беларусь супрацоўнічае з ЕБРР з 1992 года і займае 23-е месца па аб"ёмах прыцягнутых сродкаў гэтай арганізацыі. За 1992-2010 гады ў эканоміку краіны на 27 праектаў было інвеставана 300,8 млн еўра.

Прычым, як і ў выпадку са Славакіяй, Славеніяй, Эстоніяй, Турцыяй і Манголіяй, партнёрамі ЕБРР сталі прыватныя беларускія прадпрыемствы.

Менш сродкаў ад гэтага інвестара сярод 29 дзяржаваў атрымалі толькі прадпрыемствы і дзяржструктуры Турцыі, Манголіі, Кыргызтана, Туркменістана, Таджыкістана і Чарнагорыі.

У 2009 годзе намеціўся нейкі пералом у стасунках Беларусі і ЕБРР. Была зафіксаваная рэкордная колькасць праектаў, у якіх ЕБРР прыняў удзел на розных умовах. Гэта, у прыватнасці, вылучэнне сродкаў «Белгазпрамбанку» і Менскаму транзітнаму банку для фінансавання малога бізнэсу, крэдыт «Пінскдрэву», а таксама набыццё ЕБРР 25% акцыяў у сетцы крамаў дзіцячай вопраткі «Буслік».

Некаторыя эксперты меркавалі, што ва ўмовах зніжэння цікавасці прыватнага капіталу да інвеставання ў беларускую эканоміку, выкліканага наступствамі сусветнага фінансава-эканамічнага крызісу, структурныя інвестары накшталт МФК і ЕБРР павялічаць грашовыя ўліванні ў беларускі прыватны сектар.

Аднак пакуль гэтыя меркаванні не спраўджваюцца. МФК хаця і абвясціла пра два праекты ў Беларусі, перамовы па іх яшчэ не завершаныя. Шэраг прыватных беларускіх кампаніяў таксама вялі перамовы з ЕБРР. Вядома, што ў траўні на паседжанні рады кіруючых дырэктараў ЕБРР прысутнічалі прадстаўнікі «Пінскдрэва» і «Кравіры», якія разглядаюць ЕБРР як дадатковую крыніцу прыцягнення рэсурсаў.

Але за студзень-ліпень 2010 года ЕБРР не ўхваліў ніводнага беларускага праекта.