Прадстаўнікі МВФ пабывалі ў адміністрацыі Лукашэнкі

Источник материала:

Намесьнік кіраўніка адміністрацыі прэзыдэнта Беларусі Леанід Анфімаў сустрэўся з дарадцам апэратыўнага офісу МВФ па рэгіёне Эўропы, кіраўніком місіі МВФ у Беларусі Крыстафэрам Джарвісам, а таксама сталым прадстаўніком МВФ у Беларусі Натальляй Калядзінай.

На сустрэчы абмяркоўваліся пытаньні бягучага сацыяльна-эканамічнага разьвіцьця Беларусі і пляны на 2011—2015 гады.

Аглядная місія МВФ пачала працу ў Менску 3 лістапада. Экспэрты прабудуць у Беларусі да 16 лістапада.

У прадстаўніцтве МВФ у Менску паведамілі: гэта штогадовая місія, мэта якой — агляд эканамічнай палітыкі за папярэдні год і абмеркаваньне з уладамі палітыкі на будучы год і сярэднетэрміновую пэрспэктыву. У прыватнасьці, бакі абмяркуюць пытаньні грашова-крэдытнай, падаткова-бюджэтнай палітыкі і палітыкі валютнага курсу.

У прадстаўніцтве МВФ адзначаюць, што пытаньне пра новую праграму крэдытаваньня ў рамках працы місіі абмяркоўваць не плянуецца.

У 2009—2010 гадах Беларусь атрымала пяць траншаў крэдыту МВФ па праграме stand-by. Агульная сума сродкаў, выдзеленых фондам у рамках стабілізацыйнай праграмы, склала каля 3,46 млрд. даляраў.

З просьбай аб новым крэдыце ў рамках праграмы stand-by кіраўніцтва Беларусі да МВФ пакуль не зьвярталася.