У ЗША плянуюць на чвэрць скараціць спажываньне солі

Источник материала:

Асацыяцыя амэрыканскіх арганізацыяў, што займаюцца аховаю здароўя, абнародавала плян, які мае заахвоціць вытворцаў харчаваньня зьменшыць на працягу наступных пяці гадоў на 25 працэнтаў утрыманьне солі ў дзясятках прадуктаў.Пра намеры скараціць спажываньне солі ў ЗША піша ў сёньняшнім нумары брытанская “Financial Times”.

Амэрыканскі плян прадугледжвае меншае выкарыстаньне солі ў 86 катэгорыях прадуктаў: як у крамных накшталт мясных закусак і хлебабулачных вырабаў, так і ў рэстаранных, напрыклад у гамбургерах і тартох.

Названыя захады прапанавала Нацыянальная ініцыятыва для зьмяншэньня спажываньня солі. Паводле ініцыятывы, штодня амэрыканцы спажываюць солі ўдвая болей за рэкамэндаваную норму, прычым 80 % гэтай солі трапляе ў прадукты да таго, як іх набывае спажывец.

“Спажыўцы заўсёды могуць дадаць соль да ежы, але ня могуць забраць яе адтуль”, – гаворыць кіраўнік Нью-ёрскага дэпартамэнту аховы здароўя доктар Томас Фарлі. Ён зьвяртае ўвагу на тое, што пры цяперашніх узроўнях спажываньня соль пагражае здароўю людзей з нармальным ціскам. “Калі мы зможам скараціць утрыманьне солі ў фасаваных і рэстаранных прадуктах, – заўважае Фарлі, – мы дамо спажыўцом большы выбар у тым, колькі солі ім есьці, і зьменшым пры гэтым рызыку, што чалавека напаткае сэрцавая недастатковасьць ці інсульт”.

Згодна з абнародаваным плянам, узровень утрыманьня солі ў 86 катэгорыях прадуктаў мае быць скарочаны ўжо да 2012 году, а пазьней яшчэ раз скарочаны да 2014-га – у цэлым на чвэрць.

Амэрыканская праграма скарачэньня спажываньня солі падрыхтаваная на ўзор адпаведнай брытанскай, вынікам рэалізацыі якой стала за апошняе дзесяцігодзьдзе памяншэньне выкарыстаньня солі на 9 працэнтаў.