Короновирус: есть ли основания для паники?

Эпідэмія каранавірусу ў свеце працягваецца. На сённяшні дзень у Беларусі пацверджаны тры выпадкі заражэння: два – у сталіцы, адзін – у Віцебску. Аб тым, ці ёсць падставы для панікі, мы высвятлялі ў спецыялістаў Ушацкай ЦРБ.

У раёне няма!

Слухі пра тое, што ва Ушачах таксама ёсць хворыя на каранавірус Covid-19, медыкі развенчваюць. У інфекцыйнае аддзяленне, сапраўды, звярнуўся адзін чалавек, які падчас падарожжа меў кантакт з хворым. Аднак вынік праведзенага тэста аказаўся адмоўным. Знаходжанне чалавека на працягу 14 дзён у “інфекцыі” – звычайная ва ўмовах эпідэміі мера.

Па словах намесніка галоўнага ўрача Н.Дрозд, тэст на каранавірус непасрэдна ва Ушачах не робяць, але ёсць магчымасць у любы час сутак узяць біялагічны матэрыял і адправіць яго транспартам бальніцы на праверку ў Мінск. Вынік будзе гатовы на працягу 24 гадзін. Але такія тэсты будуць рабіць не ўсім жадаючым – на гэта патрэбны сур’ёзныя падставы: кантакт з чалавекам, у якога пацверджаны дыягназ “каранавірус”, нядаўняе вяртанне з краіны, дзе гэты вірус атрымаў шырокае распаўсюджанне (Кітай, Італія, Іран, Паўднёвая Карэя і іншыя).

Адрозненне ад грыпу

Як патлумачыла ўрач-інфекцыяніст Ушацкай ЦРБ В.Ярмош, каранавірус у многім падобны на грып: у чалавека ўзнікаюць агульнае недамаганне, боль у горле, можа павысіцца тэмпература цела. Два асаблівыя сімптомы – сухі кашаль і задышка.

Калі вы нядаўна вярнуліся з замежнай краіны, дзе выяўлены каранавірус, ці знаходзіліся ў аэрапорце, дзе маглі быць хворыя, на 14 дзён мінімізуйце кантакт з акружаючымі, не наведвайце месцы масавага знаходжання і пільна сачыце за самаадчуваннем. Калі з’явяцца прыгаданыя прыкметы, неадкладна звярніцеся ва ўстанову аховы здароўя – прычым, зрабіць гэта трэба па тэлефоне! Ва Ушачах можна выклікаць “хуткую дапамогу” на нумары 103, а пракансультавацца па пытаннях каранавіруснай інфекцыі – у рэгістратуры райбальніцы (5-21-57) ці ў іншай медустанове (у Віцебску – 8 (0212) 67-36-44, Полацку – (8-0214) 74-39-44, Наваполацку – ­(8-0214) 57-36-44).

Калі ж у вас лёгкія рэспіраторныя сімптомы, і вы не ез­дзілі ў краіны, дзе рэгістравалася інфекцыя (на сённяшні дзень іх 50), не кантактавалі з такімі людзьмі, захоўвайце элементарную рэспіраторную гігіену і гігіену рук, па магчымасці да выздараўлення застаньцеся дома. Пры неабходнасці па нумары 5-21-57 можна выклікаць участковага тэрапеўта на дом.

Ці выратуе маска?

Калі вы сутыкаецеся з хворымі, то адказ станоўчы. Але на вуліцах маскай карыстацца неабавязкова. Проста часцей мыйце рукі, не трыце вочы, старайцеся не датыкацца да твару пасля наведання грамадскіх месцаў.

Падрыхтавала Кацярына КАВАЛЕЎСКАЯ.