Бяляцкі: Гэта паказвае нізасць улады

Источник материала:

Cьпіс асобаў, якія прыцягаваюцца да крымінальнай адказнасьці за падзеі 19-га сьнежня, апублікаваны на сайце праваабарончай арганізацыі «Вясна» мы папрасілі пракамэнтаваць лідара арганізацыі Алеся Бяляцкага.

Бяляцкі: Мы сабралі гэтыя зьвесткі ад сваякоў затрыманых. Ім званілі з КДБ і паведамілі, што іх родныя знаходзяцца ў сьледчым Ізалятары КДБ. Яны самі ці іх знаёмыя пацьвердзілі нам гэтую інфармацыю. Мы сёньня займаліся тым, што забясьпечвалі тым з гэтых людзей, у каго іх няма, адвакатаў. Была і яшчэ адна крыніца інфармацыі, якую я не магу назваць.

На ўчора ў сьпісе было 16 чалавек.

Дракахруст: У гэтым сьпісе даволі вядомыя людзі. Я не ўбачыў у ім людзей, якія маглі біць шыбы і ламаць дзьверы ў Доме ўраду.

Бяляцкі: Тут могуць быць два варыянты. Ці гэта было справакавана спэцслужбамі і тады канцоў мы ня знойдзем. І другі варыянт — у гэтым маглі ўдзельнічаць гарачыя галовы, якія думалі, што за 5 хвілін можна перакуліць сьвет. І ў такім выпадку гэты сьпіс будзе папаўняцца.

Але я лічу, што вялікага злачынства там не было. Разьбілі шкло. Гэта безумоўна правапарушэньне. Але лёгкае. Мы бачым, як ацэньваюцца такія правапарушэньні ў нармальных дэмакратычных краінах. Там гэта адміністрацыйнае правапарушэньне і такому правапарушальніку могуць выставіць рахунак за тое, каб ён гэтую шкоду кампэнсаваў.

Мы памятаем, як Валер Шчукін быў шкло ў будынку МУС, як Арына Вячорка біла шкло ў міліцэйскім пастарунку, патрабуючы, каб ёй далі інфармацыю пра сына. Шчукін быў пакараны адміністрацыйным арыштам, Вячорка — штрафам.

Дракахруст: Як бы вы маглі пракамэнтаваць пакаяньне былога міліцыянта Аляксандра Класкоўскага, відэаролік зь якім быў вывешаны на сайце менскай міліцыі?

Бяляцкі:

Гэта ўсё ўкладаецца ў сэрыю «эфэктыўнай» працы КДБ, якая, я мяркую. такім жа чынам спрацавала і са спадаром Раманчуком, які таксама зьмяніўся на працягу адной ночы.

Частка людзей хапаецца за галаву і кажуць — што ж я нарабіў, я ж за яго галасаваў. Падобная практыка псыхалягічнага ўзьдзеяньня на затрыманых людзей з боку КДБ праяўляецца такім чынам і ня кожны можа гэта вытрымаць, калі ён раней не трапляў у падобныя сытуацыі. Асабліва калі гэта людзі з кабінэтных работнікаў, інтэлігенцыя. Прапануюцца розныя варыянты выхаду з сытуацыі, пагражаюць, што ты прападзеш канчаткова, і ўсё гэта ідзе на працягу некалькіх гадзінаў. Людзі проста «плывуць». Гэта псыхалягічны ціск і так яго трэба і ўспрымаць. Сьледчыя КДБ такім чынам паказваюць свой прафэсійны ўзровень. Але мне падаецца, што гэта паказвае нізасьць сёньняшняй улады, якая ідзе на такія крокі, каб на вачах усяго грамадзтва зламаць людзей.