У Навагрудку з’явіцца помнік заснавальніку і першаму князю ВКЛ Міндоўгу

Источник материала:

Праўда, калі менавіта гэта адбудзецца, пакуль гаварыць складана. Міністэрства культуры толькі днямі аб’явіла конкурс на стварэнне эскізных праектаў помніка. Хаця зрабіць гэта можна было б даўно. Пра Вялікае Княства Літоўскае вядома ўжо сем стагоддзяў, а яго заснавальнік да сёння ніяк не быў увекавечаны ў Беларусі, у прыватнасці, у першай сталіцы ВКЛ Навагрудку, дзе ў асноўным і праходзіла палітычная дзейнасць Міндоўга. Ідэя праекта атрымала падтрымку не толькі ў прадстаўнікоў улады і творчай інтэлігенцыі, але і простых беларусаў, якія спяшаліся пракаментаваць навіну: “Правільна! А то куды ні глянь — усюды Ленін... Як быццам гэта ўся наша гісторыя”. Зрэшты, тут можна паспрачацца, бо не толькі помнікі Ільічу можна сустрэць на вуліцах і плошчах беларускіх гарадоў. Карэспандэнт “НГ” даведалася, манументы якім знакавым гістарычным асобам часоў таго ж ВКЛ, звязаным з Беларуссю, ужо ёсць у нашай краіне.

— У вёсцы Пялеса Воранаўскага раёна два гады таму адкрыты помнік князю Вялікага Княства Літоўскага Вітаўту. Аўтар помніка — літоўскі скульптар Альгімантас Сакалаўскас. Скульптура вышынёй больш за шэсць метраў выраблена з асаблівай пароды дуба ў тэхніцы традыцыйнай літоўскай нацыянальнай разьбы па дрэве. Скульптар адлюстраваў князя ў вобразе рыцара ў кароне, які ў левай руцэ трымае скіпетр — знак улады, а правай абапіраецца на меч.

— У Лепелі два гады таму з’явіўся помнік гетману і вялікаму канцлеру ВКЛ Льву Сапегу, які пэўны час валодаў гэтым горадам. Агульная вышыня помніка з пастаментам — каля трох з паловай метраў. Леў Сапега ў  правай руцэ трымае булаву — адзнаку гетманскай улады, а левай абапіраецца на эфес шляхецкай шаблі. Аўтар помніка — мінчанін Леў Аганаў.

Удзельнічаць у конкурсе на стварэнне эскізных праектаў помніка Міндоўгу ў Навагрудку могуць прафесійныя скульптары і архітэктары. Заяўку падаць варта да 26 кастрычніка па адрасе: г. Мінск, пр. Пераможцаў, 11, каб. 316. Конкурсныя матэрыялы будуць разгледжаны журы на закрытым пасяджэнні не пазней за 2 лістапада 2012 года.

— У Брэсце чатыры гады таму адкрыты памятны крыж гетману Вялікага Княства Літоўскага Канстанціну Астрожскаму. Манументальная выява крыжа ўсталявана недалёка ад Свята-Мікалаеўскага гарнізоннага храма на тэрыторыі Брэсцкай крэпасці — на месцы, дзе ў 1596 годзе па ініцыятыве і пры ўдзеле князя Канстанціна Астрожскага адбыўся Праваслаўны Сабор.

— У Давыд-Гарадку Столінскага раёна ўсталяваны помнік ваеннаму і дзяржаўнаму дзеячу ВКЛ, заснавальніку горада Давыду Гарадзенскаму, які быў у шлюбе з дачкой вялікага князя літоўскага Гедыміна. Помнік з’явіўся ў горадзе ў канцы ХХ стагоддзя. Князь Давыд Гарадзенскі стаіць на стылізаваным зване на цэнтральнай плошчы Давыд-Гарадка.