Смерць дзяўчынкі, на якую звалілася цагляная калона, расследуе Следчы камітэт

Следчы камітэт заняўся расследаваннем смерці школьніцы ў Баранавіцкім раёне, на якую звалілася цагляная калона, інфармуе БЕЛТА.

Праверку праводзіць Баранавіцкае міжраённае ўпраўленне Следчага камітэта.  Следчыя апыталі сведкаў здарэння, чакаюцца высновы судова-медыцынскай экспертызы. Прычыны падзення цаглянага слупа высвятляюцца.

Як паведамляла Еўрарадыё, здарэнне адбылося 28 траўня ў садовым таварыстве "Крыніца". Сям'я з Мастоў з двума дзецьмі прыехала ў госці на лецішча да сябра сям'і. Бацька дапамагаў гаспадару ставіць навес і абаперся на цагляны слуп, які мусі падпіраць гэты самы навес. Аднак калона з нейкіх прычынаў павалілася проста на яго 10-гадовую дачку. Дзіця памерла ад траўмы галавы яшчэ да прыбыцця "хуткай".