Мінчанін пакрыўдзіўся на негаваркога аўтамабіліста і парэзаў колы на яго машыне

Дзіўны спосаб вымяшчэння крыўды абраў 36-гадовы мінчанін, з якім не захацеў паразмаўляць незнаёмы яму аўтамабіліст. Здарэнне адбылося ў Цэнтральным раёне сталіцы. Уладальнік аўтамабіля паставіў яго на паркоўцы і пайшоў у дом. У гэты момант да яго звярнуўся невядомы мужчына і захацеў параўмашўляць. Аўтамабіліст адмахнуўся ад мінака і сказаў, што не мае часу на размовы.

Калі ён прыйшоў у кватэру, то ўбачыў праз акно, як пакрыўджаны незнаёмец рэжа нажом колы на яго машыне. Аўтаўладальнік выклікаў міліцыю і пазней затрымала хулігана, які ўцёк з месца здарэння.

Пакрыўджаны паспеў парэзаць дзве пакрышкі і ўдарыць нагой па лабавым шкле. На яго завялі крымінальную справу паводле ч.1 арт.339 (хуліганства). Зламысніку пагражае да 3 гадоў зняволення, перадае прэс-служба ГУУС Мінгарвыканкама.