СК праводзіць праверку па факце гібелі беларускай мадэлі Наталлі Макей

Следчы камітэт Беларусі праводзіць праверку па факце гібелі беларускай мадэлі Наталлі Макей. Цела мінчанкі без прыкмет жыцця знайшлі сваякі ў кватэры каля 17-й гадзіны 15 снежня, паведаміў БЕЛТА афіцыйны прадстаўнік СК Аляксей Кісялеўскі. Паводле яго слоў, прызначаная судова-медыцынская экспертыза. Следчыя высвятляюць прычыны і абставіны здарэння.

Наталлі Макей было 43 гады. Яна вядомая як арганізатар разнастайных шоу, конкурсаў прыгажосці, заснавала сваё мадэльнае агенцтва.

Раней у СМІ з'явілася неафіцыйная інфармацыя, што жанчына заснула і не прачнулася. Нібыта, адбылося атручванне чадным газам — нешта адбылося з катлом у яе доме. Аднак Следчы камітэт у сваім паведамленні піша не пра дом, а пра кватэру і зусім нічога не згадвае пра атручванне.