Пад Віцебскам зламаўся аўтобус з Прыднястроўя, турысты замярзалі

У Віцебскім раёне зламаўся аўтобус, які ехаў з Прыднястроўя ў Санкт-Пецярбург. Турысты замярзалі — тэмпература паветра на вуліцы складала мінус 18 градусаў. Як піша ў Facebook прадстаўнік ДАІ УУС Віцебскага аблвыканкама Аляксандр Казючыц, здарэнне адбылося каля 17-й гадзіны ў чацвер каля вёскі Копці. У аўтобусе лопнула левае задняе кола. У салоне знаходзіліся 7 пасажыраў і 2 кіроўцы. Апошнія самі спрабавалі адрамантаваць тармазную сістэму і замяніць кола, рухавік быў выключаны, салон не абаграваўся.

Супрацоўнікі ДАІ і прадстаўнікі мясцовых уладаў дапамагалі адаграваць замежнікаў, пакуль іх транспарт не адрамантавалі. З сталовай бліжэйшай вёскі была прывезена гарбата. Рамонт працягваўся каля гадзіны. Пасля гэтага даішнікі суправаджалі аўтобус у Віцебск для дыягностыкі. Праз нейкі час турысты працягнулі сваю паездку ў Расію.