У Гродне затрымалі п'янага кіроўцу з паламанай правай рукой

Віноўніка ДТЗ у Гродне дапамог затрымаць адзін з мінакоў.

Здарэнне, як паведамляе ДАІ Гродна, адбылося позна ўвечары 31 траўня ў двары дома па вуліцы Брыкеля. 

46-гадовы гараджанін з таварышам выпіў гарэлкі, пасля чаго вырашыў перапаркаваць свой "Крайслер". Кіроўца рухаўся заднім ходам, у выніку наехаў на лаву і прыпаркаваны "Фальксваген".

Юнак, які стаў відавочцам здарэння, дапамог кіроўцу выйсці і выклікаў на месца нарад ДАІ.

Выявілася, што ўтрыманне алкаголю ў кіроўцы перавышала дапушчальную норму ў тры разы. Да таго ж мужчына быў пазбаўлены права кіравання за такое самае парушэнне. Кіроўца заявіў, што год таму перанёс клінічны інсульт. У пратаколах ён распісваўся левай рукой, бо правая была зламаная.