ХХІІ Міжнародная спецыялізаваная выстаўка «СМІ ў Беларусі» пачынае работу

Источник материала:

3 мая, Мінск /Кар. БЕЛТА/. ХХІІ Міжнародная спецыялізаваная выстаўка «СМІ ў Беларусі» сёння пачынае работу, паведамілі БЕЛТА ў Міністэрстве інфармацыі.

Урачыстая цырымонія адкрыцця адбудзецца ў 12.00. Выстаўка будзе праходзіць з 3 па 5 мая. У ёй прымаюць удзел больш за 50 экспанентаў, якія прадстаўляюць каля 400 сродкаў масавай інфармацыі з Беларусі, Расіі, Украіны, Казахстана, Латвіі, Літвы, Польшчы, Кітая, Турцыі і іншых краін. Упершыню будуць прадстаўлены СМІ з Салехарда Ямала-Ненецкай аўтаномнай акругі. Экспазіцыйная плошча выстаўкі — большая за 1 тыс. кв. м.

Выстаўка «СМІ ў Беларусі» адлюстроўвае ўвесь спектр інфармацыйнай прасторы краіны. Яе ўдзельнікі — друкаваныя і аўдыявізуальныя рэспубліканскія і рэгіянальныя СМІ, інтэрнэт-рэсурсы, інфармацыйныя агенцтвы, аператары і дыстрыб'ютары кабельнага тэлебачання, распаўсюджвальнікі друкаванай прадукцыі, выдавецтвы.

Наведвальнікі змогуць азнаёміцца з экспазіцыямі рэспубліканскіх і рэгіянальных друкаваных і электронных СМІ, спецыялізаванымі і ведамаснымі выданнямі, газетамі вышэйшых навучальных устаноў і прамысловых прадпрыемстваў, навуковых арганізацый.

Выстаўка прапануе медыйнай супольнасці і наведвальнікам насычаную праграму, якая ўключае ў сябе прэзентацыі інфармацыйных і інтэрнэт-праектаў, аўтограф-сесіі, майстар-класы, флэш-акцыі і многае іншае.

Кіраўнікі сродкаў масавай інфармацыі і журналісты, прадстаўнікі экспертнай супольнасці абмяркуюць значныя пытанні функцыянавання медыясферы, ролю СМІ ў развіцці грамадства і дзяржавы ў рамках дзелавой праграмы выстаўкі.

У час выстаўкі адбудуцца прэзентацыя тэлеканала «Бел-Рос» ТРА Саюза, прэзентацыя БЕЛТА для менеджараў і супрацоўнікаў маркетынгавых службаў вядучых прадпрыемстваў Беларусі. Важным стане выступленне намесніка галоўнага рэдактара МІА «Расія сёння» Наталлі Лосевай для кіраўнікоў СМІ на тэму «Глабальныя трэнды для новых медыя».

Шэраг мерапрыемстваў будзе прысвечаны Году малой радзімы. Круглы стол «Мая малая Радзіма» правядзе РВУ "Выдавецкі дом «Звязда» сумесна з «Настаўніцкай газетай». БЕЛТА прадставіць праект «Легенды малой радзімы: слуцкія паясы», СМІ Гродзенскай вобласці правядуць прэзентацыю і майстар-клас праекта «Замкі Беларусі».

Новаўвядзенне сёлетняй выстаўкі СМІ — Дзень рэгіянальнай прэсы, паколькі яна адыгрывае ў інфармацыйнай прасторы важную ролю. Дзень рэгіянальнай прэсы пройдзе 4 мая.

Яшчэ адной асаблівасцю стане Дзень дзяцей і моладзі. Дзіцячая пляцоўка, якая будзе працаваць у час выстаўкі, прапануе цікавыя разнапланавыя праграмы, а 5 мая пройдзе вялікая колькасць мерапрыемстваў для дзяцей.

Па традыцыі на выстаўцы «СМІ ў Беларусі» ўшаноўваюць пераможцаў і лаўрэатаў Нацыянальнага конкурсу друкаваных сродкаў масавай інфармацыі «Залатая Літара». Узнагароды 14-га конкурсу будуць уручаны 3 мая.

ХХІІ Міжнародная спецыялізаваная выстаўка «СМІ ў Беларусі» пройдзе ў выставачным комплексе па адрасе пр. Пераможцаў, 14.

Міжнародная спецыялізаваная выстаўка «СМІ ў Беларусі» праводзіцца штогод з 1997 года Міністэрствам інфармацыі пры падтрымцы Міністэрства замежных спраў, Мінскага гарвыканкама, РУП "Нацыянальны выставачны цэнтр «БелЭкспа», іншых органаў дзяржаўнага кіравання, вядучых СМІ, грамадскіх арганізацый.