Фатографа Свабоднага тэатра збіў кіроўца аўтобуса ECOLINES

Фатографа Свабоднага тэатра Мікалая Купрыча збіў кіроўца аўтобуса ECOLINES, што ішоў рэйсам з Кіева ў Мінск. Пра гэты інцыдэнт паведаміў у Фэйсбуку кіраўнік тэатра Мікалай Халезін.

Паводле Халезіна, Свабодны тэатр быў у Кіеве на гастролях і вяртаўся адтуль у Мінск. Купрыч здымаў матэрыял для фільма пра тэатр. Калі аператар падышоў да рэйсавага аўтобуса, які ішоў у Мінск, кіроўца паглядзеў на камеру на плячы ў Купрыча і заявіў, што не пусціць яго ў салон.

“На пытанне “чаму?” кіроўца проста парваў квіток. Мікалай уключыў камеру і спытаў, на падставе чаго яго не пускаюць у аўтобус. Кіроўца разбіў яму камеру, а затым збіў, пашкодзіўшы галаву”, — напісаў Халезін.

Пасля гэтага аўтобус з’ехаў, а пацярпелы аператар выклікаў паліцыю. Купрыча адвезлі ў аддзяленне Галасееўскага раёна Кіева, дзе ён склаў заяву. Кампанія ECOLINES між тым адмовілася падаваць прозвішча кіроўцы, які ажыццяўляў рэйс з Кіева ў Мінск.