На гераічнай обальскай зямлі прайшлі ўрачыстасці 3 ліпеня

У нашым раёне ў гады Вялікай Айчыннай вайны загінуў кожны трэці жыхар. Але літаральна гарэла на нагамі акупантаў беларуская зямля, партызаны і падпольшчыкі не давалі захопнікам спакою ні днём, ні ноччу. Гераічныя старонкі ўпісалі ў гісторыяю вызвалення нашай краіны члены Обальскай падпольнай камсамольскай арганізацыі “Юныя мсціўцы”.

– Члены обальскага падполля – родныя і блізкія для кожнага абальчаніна. Іх подзвіг застаецца ў народнай памяці. 17 удзельнікаў арганізацыі ўзнагароджаны баявымі ордэнамі і медалямі, а Ефрасіння Зянькова і Зінаіда Партнова атрымалі званне Герояў Савецкага Саюза, – адзначыла ў сваім выступленні старшыня раённага Савета дэпутатаў Ірына Новікава.  Ірына Мікалаеўна падкрэсліла, што сёння толькі ад нас залежыць лёс нашай малой радзімы і толькі мы можам зрабіць яе квітнеючай. Ад імя раённага выканаўчага камітэта і раённага Савета дэпутатаў яна павіншавала абальчан  з галоўным святам краіны.

Хвіліна маўчання. Кветкі, вянкі і гірлянды ад сённяшняга пакалення кладуцца да стэлы і абеліску ў гонар обальскіх герояў-камсамольцаў.

Жывы інтарэс выклікала ў абальчан фотадакументальная выстава “Не змоўкне слава  тых вялікіх год”, якую падрыхтавалі мясцовыя клуб, бібліятэка, музей і школа.  Цікаўнасць выклікаў кожны экспанат выставы – ваенная форма часоў Вялікай Айчыннай вайны, архіўныя матэрыялы і кнігі, малюнкі вучняў школы на ваенную тэму.  Людзі цікавіліся, пыталіся пра пэўныя звесткі, у кнігах шукалі прозвішчы сваякоў і знаёмых.

Багата людзей было і каля супрацоўнікаў раённага аддзела па надзвычайных сітуацыях, якія праводзілі акцыю “З клопатам пра бяспеку малой радзімы”. У гульнявай форме тут расказвалі  пра асноўныя правілы бяспекі, прапаноўвалі разабрацца з рознымі сітуацыямі, адказаць на пытанні па асабістай бяспецы, была магчымасць і апрануць касцюм выратавальніка. Гэты інтэрактыўны пост-пляцоўка  зацікавіў як дзяцей, так і дарослых.

З песні “Беларусь” пачалі сваё выступленне салісты Віцебскай філармоніі, якія прывезлі абальчанам святочны канцэрт. Віцебскія артысты прапанавалі песні пра нашу родную краіну, яе гісторыю і будучыню. Шчырымі былі гучныя апладысменты, імі  адорвалі жыхары пасёлка артыстаў.

Аляксандр ШЭДЗЬКО.

Надрукавана ў №52 ад 05.07.2019 г.