Аляксандр Лукашэнка: "Дэмакратыя стала толькі шырмай для распальвання пажару арабскай дугі"

Источник материала:

Прэзідэнт Беларусі Аляксандр Лукашэнка лічыць, што дэмакратыя стала толькі шырмай для распальвання пажару арабскай дугі. Такое меркаванне ён выказаў 9 кастрычніка ў інтэрв'ю брытанскім СМІ: газеце "Індэпендэнт" і тэлеканалу Бі-бі-сі, паведамілі БЕЛТА ў прэс-службе кіраўніка дзяржавы.

У час размовы былі зададзены пытанні, якія датычацца розных бакоў жыцця краіны: знешняй і ўнутранай палітыкі, эканомікі, сацыяльнага развіцця дзяржавы. Аляксандр Лукашэнка адказаў таксама на шэраг асабістых пытанняў. Значная ўвага была ўдзелена тэме грамадскага прагрэсу і развіцця дэмакратыі.

У прыватнасці, ацэньваючы падзеі ў Паўночнай Афрыцы і на Блізкім Усходзе, Прэзідэнт адзначыў: "Няпростая была сітуацыя ў гэтых краінах, але не горшая, чым у іншых. Але камусьці спатрэбілася падпаліць гэты пажар арабскай дугі. Я ў першыя ж дні, калі пачаліся гэтыя рэвалюцыі, сказаў, што трэба асудзіць Захад за ўмяшанне, ніхто не мае права ўмешвацца ва ўнутраныя справы дзяржаў, яны самі павінны разабрацца ў сваіх пытаннях. Я тады сказаў, што гэтага ні ў якім выпадку нельга было рабіць і да чаго гэта прывядзе. Толькі-толькі ў Тунісе ўляглося, на Лівію ўсё перакінулася... Ці тое яшчэ будзе!"

"Сёння мы бачым, да чаго гэта прывяло — успыхнула ўся дуга: з аднаго боку Ірак, і далей ужо на Іран спрабуюць перакінуць, з другога боку Туніс, Алжыр і гэтак далей. І ўсюды вельмі горача. Але дзіўна, што з гэтай дугі былі выключаны дзяржавы, якія падтрымліваюць цесныя адносіны з ЗША, а ў гэтых жа дзяржавах аналагічная сітуацыя. Вас гэта не насцярожвае? — сказаў кіраўнік дзяржавы. — Я ведаю, чаму гэта адбываецца. Тое, што гэта сцэнарый заакіянскі або заморскі, і няўзброеным вокам відаць. І пасля таго як сітуацыя пачынала развівацца ў нявыгадным для іх (гэтых сцэнарыстаў) ключы, яны пачалі адкрытыя бамбардзіроўкі. Але пытанне нават не ў гэтым. Навошта гэта было патрэбна? Я тады сказаў, да чаго гэта прывядзе, і гэта здарылася адзін да аднаго. Што, патрэбна была ісламізацыя арабскага Усходу? Патрэбна ім было гэта? Не. Яны і самі сёння не рады, калі яны ўжо разумеюць, што яны рабілі і што яны робяць цяпер".

Прэзідэнт падкрэсліў, што нікому "не патрэбны экспарт рэвалюцыі". "Дык навошта экспартаваць дэмакратыю? У іх разуменні гэтага слова. Дэмакратыя — гэта добра, але ці гатовы народ і ці ёсць умовы для прыняцця такой дэмакратыі ў краіне? Яны ж гэта бачылі, што гэта немагчыма, што гэтыя дзяржавы не гатовы да такога. Ну, якая дэмакратыя сёння ў Іраку, калі там кожны дзень узрываюцца бомбы і сотні людзей гінуць, а яшчэ горш калекамі тысячы застаюцца? А колькі было знішчана? Каму яна патрэбна, такая дэмакратыя?" — адзначыў кіраўнік дзяржавы.

"Ірак ім трэба было раздзяліць, я гэта добра ведаю, ім нафта патрэбна была. Каму гэта сёння не зразумела? Дэмакратыя — гэта шырма, прыкрыццё гэтага разбойнага працэсу. Адсюль і разглагольстваванні аб дэмакратыі. Таму не аб дэмакратыі тут размова", — дадаў Аляксандр Лукашэнка.

У цэлым Прэзідэнт размаўляў амаль чатыры гадзіны і адказаў больш як на 60 пытанняў.