Змены ў выбарчае заканадаўства дэпутаты разгледзяць цягам 10 дзён

Источник материала:

На 30 лістапада ў Палаце прадстаўнікоў прызначаны слуханні па зменах у выбарчае заканадаўства ў першым чытанні, у другім чытанні — на 10 снежня. Пра гэта ў інтэрв’ю БелаПАН паведаміла старшыня Цэнтральнай камісіі па выбарах і правядзенні рэспубліканскіх рэферэндумаў Лідзія Ярмошына.

«Да канца работы гэтай сесіі палат Нацыянальнага сходу, а яна закрываецца 18 снежня, я ўпэўнена, законапраект будзе прыняты», — сказала яна.

Набыць моц законапраект павінен праз 10 дзён пасля афіцыйнага апублікавання.

«У 20‑х лічбах студзеня з’явіцца ўказ аб правядзенні мясцовых выбараў. Да гэтага часу дакумент будзе падпісаны і апублікаваны», — сказала Ярмошына.

Яна адзначыла вялікае грамадскае значэнне гэтага закона.

«З моманту даручэння кіраўніка дзяржавы аб распрацоўцы прапаноў па змене выбарчага заканадаўства ўсе сродкі масавай інфармацыі размясцілі публікацыі на гэтую тэму, прайшла анлайн‑канферэнцыя з маім удзелам. Усе маглі абмеркаваць інфармацыю», — заўважыла Ярмошына.

«Што да арганізацыі форумаў, то, вы ведаеце, калі хочаш пахаваць любую ідэю — наладзь грамадскае абмеркаванне», — сказала кіраўнік Цэнтрвыбаркама.