Сусветны банк дасць яшчэ грошай

Источник материала:

Сусветны банк (СБ) у 2010—2011 гадах павялічыць штогод даступны аб"ём фінансавай дапамогі Беларусі са 100 млн. да 250 млн. даляраў ЗША.

Гэта прадугледжана ўдакладненай Стратэгіяй супрацоўніцтва Беларусі і Сусветнага банка на 2008—2011 гады, паведаміў 3 снежня ў Мінску дырэктар аддзела Беларусі, Малдовы і УкраіныеСБ Марцін Райзер на сустрэчы з намеснікам прэм"ер-міністра Беларусі Андрэем Кабяковым.

«Гэта дазваляе ўзмацніць сумесную працу над узаемавыгаднымі праектамі», — падкрэсліў Райзер.

Беларусь звярнулася да Сусветнага банка па фінансаванне для падтрымання інвестыцыйных праграм урада ў сектарах аўтамабільных дарог і чыгункі, а таксама фінансавання для праекта па рэабілітацыі раёнаў, што пацярпелі ад аварыі на ЧАЭС.

Абноўленая стратэгія супрацоўніцтва прадугледжвае, што Сусветны банк у 2011 годзе можа выдзеліць Беларусі яшчэ адну пазыку на мэты развіцця ў аб"ёме 100 млн. даляраў пры ўмове прагрэсу ў сферы структурных рэформ.

Разам з тым, як заявіў 3 снежня журналістам міністр фінансаў Андрэй Харкавец, урад пакуль з такой просьбай да СБ не звяртаўся. «Запазычанні вызначаюцца перш за ўсё патрэбай ў іх. Ясна, што тыя ўмовы, якія прадастаўляе нам сёння Сусветны банк, — адны з найбольш камфортных і зручных для пазычальніка. Таму мы зацікаўлены ў прыцягненні новых рэсурсаў, але іх аб"ём будзе залежаць ад сум, у якіх мы будзем мець патрэбу», — сказаў міністр.

***

Беларусь стала членам Сусветнага банка ў 1992 годзе. За гэты час краіне было выдзелена 643 млн. даляраў ЗША на рэалізацыю дзевяці праектаў; каля 30 нацыянальных праграм атрымалі грантавую падтрымку на агульную суму 18 млн. даляраў ЗША. Цяпер Беларусь выкарыстоўвае сродкі СБ для фінансавання чатырох праектаў па развіцці інфраструктуры.