У люстэрку замежнай прэсы

Источник материала:

Французскія СМІ "пахавалі" Еўропу і не вераць у светлы лёс еўра

Еўра яшчэ не мёртвы, а Еўропа, магчыма, ужо так, — лічыць галоўны рэдактар французскага часопіса Lе Роіnt Эрвэ Гаценьё, піша ІnоРrеssа.

"На жаль, не трэба быць нобелеўскім лаўрэатам па эканоміцы, каб зразумець, што банкруцтва не пагражае Грэцыі, а яна ўжо банкрут. Шматлікія каментатары робяць выгляд, што Дамінік Строс-Кан сказаў штосьці жудаснае, прапанаваўшы спісаць доўг Грэцыі, але насамрэч пра гэта кажуць (вядома, шэптам) усе палітычныя лідары па ўсёй Еўропе. Таму паўстае пытанне, ці можа Еўропа яшчэ зрабіць штосьці, каб перашкодзіць гэтаму працэсу, ці фінансавы крызіс ужо прадэманстраваў палітычнае банкруцтва", — адзначае Гаценьё.

Паводле меркавання публіцыста, цяжкае становішча Грэцыі выклікана сённяшнім расколам у Еўропе і папярэднім папушчальніцтвам, калі ўсім было напляваць, што Грэцыя "пагразае ў карумпаванай і безадказнай сістэме", і ніхто нават не спрабаваў змагацца з падатковымі парушэннямі і ценявой эканомікай. Паводле слоў журналіста, вялікая еўрапейская мара "ператварылася ў кашмар".

"На працягу многіх гадоў еўрапейскае будаўніцтва ўяўлялася грамадзянам як палітычны ідэал. Усе пярэчанні адкідаліся ў імя прагрэсу і аднадумства, а праціўнікі далейшага пашырэння ЕС зводзіліся ў ранг рэтраградаў-абскурантыстаў, не здольных зразумець, што для іх лепш. У выніку ў імя аднадумства мы перайшлі ад адзінага рынку да адзінай валюты. Грамадская думка была пастаўлена перад фактам. А зараз ім тлумачаць, што катастрофу можна было прадбачыць. Дзіўна яшчэ, што гнеў жыхароў Грэцыі ці Іспаніі не прымае больш рэзкіх формаў", — мяркуе Гаценьё.

Выдатная еўрапейская ўтопія дыскрэдытаваная, канстатуе аўтар артыкула. "Еўрапейскія народы больш не жадаюць быць разам і ў радасці, і ў горы, — піша выданне. — Як у байцы "Страказа і Мурашка", немцы, фіны, галандцы (а таксама французы) адмаўляюцца плаціць за вар'яцтвы грэкаў. Як іх можна за гэта папракаць? Па логіцы, усё павінна было б скончыцца выхадам Грэцыі з еўразоны. Ці выхадам Германіі. У абодвух выпадках выратаванне еўра рызыкуе стаць першачарговай задачай у параўнанні з умацаваннем Еўропы. І рашэнне прымаць будуць зусім не грамадзяне".